പ്രവാസികള്‍ക്ക് ആശ്വാസം; കേരളത്തിലേക്ക് സര്‍വീസുകള്‍ പുനരാരംഭിക്കാൻ എയര്‍ ഇന്ത്യ എക്സ്‍പ്രസ്

മസ്കത്ത്: വിമാനങ്ങള്‍ കൂട്ടത്തോടെ റദ്ദാക്കിയതിനെത്തുടർന്ന് ദുരിതത്തിലായ ഒമാൻ പ്രവാസികള്‍ക്ക് ആശ്വാസവാർത്ത. കണ്ണൂർ സർവീസിന് പിന്നാലെ മസ്‌കത്ത്-തിരുവനന്തപുരം സർവീസും കമ്പനി പുനഃസ്ഥാപിച്ചു. ഏപ്രില്‍ 5 മുതല്‍ ഏപ്രില്‍ 30 വരെയുള്ള പുതിയ ഷെഡ്യൂളിലാണ് തിരുവനന്തപുരം സർവീസിനെ ഉള്‍പ്പെടുത്തിയിരിക്കുന്നത്.

പത്ത് ദിവസം മുമ്പ് മസ്‌കത്തില്‍ നിന്നുള്ള എല്ലാ കേരള സർവീസുകളും റദ്ദാക്കിയത് പ്രവാസികള്‍ക്കിടയില്‍ വലിയ ആശങ്കയുണ്ടാക്കിയിരുന്നു. തിങ്കള്‍, ബുധൻ, വെള്ളി, ഞായർ ദിവസങ്ങളിലാണ് തിരുവനന്തപുരത്തേക്കുള്ള സർവീസുകള്‍ ക്രമീകരിച്ചിരിക്കുന്നത്. മസ്‌കത്തില്‍ നിന്ന് രാത്രി 11:25-ന് പുറപ്പെടുന്ന വിമാനം പുലർച്ചെ 4:55-ന് തിരുവനന്തപുരത്ത് എത്തും. ഇതേ ദിവസങ്ങളില്‍ തന്നെ രാത്രി 8:10-ന് പുറപ്പെട്ട് പുലർച്ചെ 1:20-ന് എത്തുന്ന രീതിയിലാണ് കണ്ണൂർ സർവീസും ക്രമീകരിച്ചിരിക്കുന്നത്.

അതേസമയം, കോഴിക്കോട്, കൊച്ചി എന്നിവിടങ്ങളിലേക്കുള്ള സർവീസുകള്‍ പുതിയ ഷെഡ്യൂളിലും ഉള്‍പ്പെടുത്തിയിട്ടില്ല എന്നത് യാത്രക്കാർക്ക് തിരിച്ചടിയാണ്. ഈ സെക്ടറുകളിലേക്കുള്ള സർവീസുകള്‍ എന്ന് പുനരാരംഭിക്കുമെന്ന കാര്യത്തില്‍ എയർ ഇന്ത്യ എക്സ്പ്രസ് ഇതുവരെ വ്യക്തത നല്‍കിയിട്ടില്ല. അവധിക്കാലം ആരംഭിക്കാനിരിക്കെ തിരുവനന്തപുരം, കണ്ണൂർ ഭാഗങ്ങളിലുള്ളവർക്ക് പുതിയ തീരുമാനം വലിയ ആശ്വാസമാകും.

SUMMARY: Relief for expatriates; Air India Express to resume services to Kerala