ഛത്തീസ്ഗഡ്: ഛത്തീസ്ഗഡിലെ ജാഷ്പുർ ജില്ലയില്‍ സ്വകാര്യ ചാർട്ടേഡ് വിമാനം തകർന്നുവീണ് രണ്ട് പൈലറ്റുമാർ കൊല്ലപ്പെട്ടു. നാരായണ്‍പുർ പോലീസ് സ്റ്റേഷൻ പരിധിയിലുള്ള ഖുരാസഗഢ ഗ്രാമത്തിന് സമീപത്തെ രതൻപഹ്‌ലി വനമേഖലയിലാണ് തിങ്കളാഴ്ച ഉച്ചയോടെ അപകടമുണ്ടായത്.
ഭൂനിരപ്പില്‍ നിന്ന് ഏകദേശം 30 അടി മാത്രം ഉയരത്തില്‍ അസാധാരണമാംവിധം താഴ്ന്നു പറക്കുകയായിരുന്ന വിമാനം മരത്തിലിടിച്ച്‌ താഴേക്ക് പതിക്കുകയായിരുന്നുവെന്ന് ദൃക്‌സാക്ഷികള്‍ പറയുന്നു. അപകടത്തിന് പിന്നാലെ വനമേഖലയില്‍ നിന്ന് വലിയ രീതിയില്‍ പുകപടലങ്ങള്‍ ഉയരുന്നത് ദൂരസ്ഥലങ്ങളില്‍ നിന്നുപോലും ദൃശ്യമായിരുന്നു. ഒറ്റ എൻജിനുള്ള ചെറിയ പ്രൊപ്പല്ലർ വിമാനമാണ് അപകടത്തില്‍പ്പെട്ടതെന്നാണ് പ്രാഥമിക സൂചന.
അപകടസ്ഥലത്തേക്ക് ജാഷ്പുരില്‍ നിന്നും നാരായണ്‍പുരില്‍ നിന്നും പോലീസ് ഉദ്യോഗസ്ഥരും അഗ്നിശമന സേനയും ഉടൻ തന്നെ കുതിച്ചെത്തി. വനമേഖലയായതിനാല്‍ രക്ഷാപ്രവർത്തനം ദുഷ്കരമായിരുന്നു. പൈലറ്റുമാരുടെ മൃതദേഹങ്ങള്‍ വനത്തിനുള്ളില്‍ നിന്ന് കണ്ടെടുത്തു. വിമാനം തകരാനുണ്ടായ യഥാർത്ഥ കാരണം വ്യക്തമല്ലെന്നും വിശദമായ അന്വേഷണത്തിന് ശേഷമേ കൂടുതല്‍ വിവരങ്ങള്‍ ലഭ്യമാകൂ എന്നും അധികൃതർ അറിയിച്ചു.
SUMMARY: Private plane crashes in Chhattisgarh, pilots killed
