സുല്ത്താന്പൂര്: ഫാമിലെ കോഴികള് കൂട്ടത്തോടെ ചത്തതില് ഡിജെയ്ക്കെതിരെ പരാതിയുമായി ഫാം ഉടമ. ഉത്തര്പ്രദേശിലെ സുല്ത്താൻപൂര് ജില്ലയിലാണ് സംഭവം. സാബിര് അലിയാണ് പോലീസില് പരാതി നല്കിയിരിക്കുന്നത്.
ഏപ്രിൽ 25ന് രാത്രി 9.30ഓടെയാണ് സംഭവം. പ്രദേശവാസിയായ ബബ്ബൻ വിശ്വകർമയുടെ മകളുടെ വിവാഹഘോഷയാത്ര സാബിറിന്റെ പൗൾട്രി ഫാമിന് സമീപത്തു കൂടി കടന്നുപോയിരുന്നു. ഘോഷയാത്രയിൽ ഡിജെ ഉപയോഗിച്ച് അമിത ശബ്ദത്തിൽ പാട്ട് വെച്ചിരുന്നതായും ഇത് കേട്ട് പരിഭ്രാന്തരായ കോഴികൾ കൂട്ടത്തോടെ ചത്തുവെന്നുമാണ് പരാതിയിൽ പറയുന്നത്.
ശബ്ദം കുറയ്ക്കാൻ താൻ ആവശ്യപ്പെട്ടെങ്കിലും വിവാഹ സംഘം തയ്യാറായില്ലെന്ന് സാബിർ അലി ആരോപിക്കുന്നു. ഡിജെയുടെ ഉയർന്ന തീവ്രതയിലുള്ള ശബ്ദം താങ്ങാനാകാതെ കോഴികൾ ഹൃദയസ്തംഭനം മൂലമാണ് ചത്തതെന്ന് ഉടമ പറയുന്നു. ഡിജെ ഓപ്പറേറ്ററായ കവി യാദവിനെതിരെയാണ് കുദ്വാർ പൊലീസ് കേസെടുത്തിരിക്കുന്നത്.
ഉയർന്ന ശബ്ദതരംഗങ്ങൾ പക്ഷികളിലും മൃഗങ്ങളിലും കടുത്ത മാനസിക സമ്മർദ്ദമുണ്ടാക്കുമെന്നും ഇത് മരണത്തിന് വരെ കാരണമാകുമെന്നും വിദഗ്ധർ ചൂണ്ടിക്കാട്ടുന്നു.
വിവാഹസംഘത്തിന്റെ ഘോഷയാത്ര കാരണം തനിക്ക് വലിയ നഷ്ടമുണ്ടായെന്നും ഇത് ഡിജെയില് നിന്നോ വിവാഹം നടത്തിയ കുടുംബത്തില് നിന്നോ ഈടാക്കണമെന്നാണ് ഫാം ഉടമയുടെ ആവശ്യം.
SUMMARY: 140 chickens die in farm after listening to loud DJ music; Police register case
WhatsApp
Telegram
