ബെംഗളൂരു: വീടിനുമുന്നിൽ കളിച്ചു കൊണ്ടിരിക്കെ, ഇരുമ്പുഗേറ്റ് തകർന്നുവീണ് അഞ്ച് വയസ്സുകാരി മരിച്ചു. മൂന്ന് വയസ്സുള്ള മറ്റൊരു കുട്ടിക്ക് പരുക്കേറ്റു. ബെംഗളൂരു ചിക്കബനവാരയിലെ ദ്വാരക നഗറിലാണ് അപകടമുണ്ടായത്. ബല്ലാരി വിജയനഗർ സ്വദേശികളായ ഇമാം- റമീജ ദമ്പതികളുടെ മകൾ ഗൗസിയയാണ് മരിച്ചത്. ഇമാമിന്റെ സഹോദരി ഷക്കീലയുടെ മകൾ സുമയ്യക്കാണ് പരുക്കേറ്റത്. കഴിഞ്ഞ ദിവസം വൈകിട്ടായിരുന്നു സംഭവം. സുമയ്യയെ സ്വകാര്യാശുപത്രിയിൽ പ്രവേശിപ്പിച്ചു.
അഞ്ചുമാസം മുൻപാണ് ഇവരുടെ കുടുംബം ദ്വാരക നഗറിലെ വാടകവീട്ടിലേക്ക് മാറിയത്. കുട്ടികൾ ഗേറ്റിൽ തൂങ്ങി കളിക്കുമ്പോൾ അവരുടെമേൽ ഇടിഞ്ഞുവീഴുകയായിരുന്നു. അപകടം കണ്ട് ഓടിയെത്തിയ അയൽക്കാരാണ് കുട്ടികളെ ആശുപത്രിയിലെത്തിച്ചത്. തലയ്ക്ക് ഗുരുതരമായി പരുക്കേറ്റ ഗൗസിയ സംഭവസ്ഥലത്തുതന്നെ മരിച്ചു.
കുട്ടികളുടെ രക്ഷിതാക്കളുടെ പരാതിയിൽ വീട്ടുടമസ്ഥൻ രവിശങ്കറിനെതിരേ ചിക്കബനവാര പോലീസ് കേസെടുത്തു.
