മറയൂര്: കാന്തല്ലൂരില് മധ്യവയസ്കന് മരിച്ച സംഭവം കാട്ടാന ആക്രമണത്തെ തുടര്ന്നാണെന്ന് പോസ്റ്റുമോര്ട്ടം റിപോര്ട്ട് സ്ഥിരീകരിച്ചു. ചുരക്കുളം ഉന്നതി സ്വദേശി മുരുകനാണ് ഇന്നലെ മരിച്ചത്. മരണകാരണം സംബന്ധിച്ച് നേരത്തെ ഉയര്ന്ന സംശയങ്ങള്ക്കിടെയാണ് റിപോര്ട്ട് പുറത്തുവന്നത്. മുരുകന്റെ മുതുകില് കാട്ടാനയുടെ ചവിട്ടേറ്റതായും നിരവധി വാരിയെല്ലുകള് ഒടിഞ്ഞതായും പോസ്റ്റുമോര്ട്ടം റിപോര്ട്ടില് വ്യക്തമാക്കുന്നു.
സംഭവത്തെ തുടര്ന്ന് മൂന്നാര് ഡിവൈഎസ്പിയുടെ മധ്യസ്ഥതയില് നടന്ന ചര്ച്ചയില് മരിച്ചയാളുടെ കുടുംബത്തിന് അഞ്ചു ലക്ഷം രൂപ ധനസഹായം നല്കാന് വനംവകുപ്പ് സമ്മതിച്ചു. തുക കൈമാറിയ ശേഷമേ മൃതദേഹം ഏറ്റുവാങ്ങൂവെന്നാണ് ബന്ധുക്കളുടെ നിലപാട്. സമീപത്തെ നിര്മാണ സ്ഥലത്തെ ജോലി കഴിഞ്ഞ് ആടുകള്ക്ക് തീറ്റ ശേഖരിക്കാന് കൃഷിയിടത്തിലെത്തിയപ്പോഴാണ് മുരുകന് നേരെ കാട്ടാന ആക്രമണമുണ്ടായത്.
സംഭവത്തില് പോലിസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിരുന്നു. പ്രദേശത്ത് തമ്പടിച്ചിരുന്ന കാട്ടാനയെ ആവശ്യമായ മുന്കരുതലുകളോ ജനങ്ങള്ക്ക് മുന്നറിയിപ്പോ നല്കാതെ വനംവകുപ്പ് തുരത്തിയതാണ് ദുരന്തത്തിന് കാരണമായതെന്ന് നാട്ടുകാര് ആരോപിച്ചു. സംഭവത്തില് വനംവകുപ്പിന്റെ നടപടികളും സുരക്ഷാ ക്രമീകരണങ്ങളും സംബന്ധിച്ച് അന്വേഷണം ശക്തമാക്കണമെന്ന ആവശ്യവും ഉയരുന്നുണ്ട്.
SUMMARY: Postmortem report refutes Forest Department’s claim; Middle-aged man killed in Marayoor attack by wild elephant
