ബെംഗളൂരു: കെംപെഗൗഡ ജയന്തി ആഘോഷങ്ങളോടനുബന്ധിച്ചുള്ള തിരക്ക് പരിഗണിച്ച് നഗരത്തിലെ വിവിധ ഇടങ്ങളില്‍ ഗതാഗത നിയന്ത്രണം ഏര്‍പ്പെടുത്തി കെംഗേരി ട്രാഫിക് പോലീസ് സ്റ്റേഷൻ പരിധിയിലെ പുതുതായി വികസിപ്പിച്ച കെംപെഗൗഡ ലേഔട്ടിലാണ് പ്രധാന ആഘോഷ പരിപാടി നടക്കുക. മുഖ്യമന്ത്രി ഡി കെ ശിവകുമാർ പരിപാടി ഉദ്ഘാടനം ചെയ്യും. മന്ത്രിമാർ, ജനപ്രതിനിധികൾ, വിവിധ മേഖലയിലെ പ്രമുഖർ എന്നിവരടക്കം 50,000ത്തോളം പേർ ചടങ്ങിൽ പങ്കെടുക്കുമെന്നാണ് പ്രതീക്ഷിക്കുന്നത്.
ശനിയാഴ്ച രാവിലെ 6 മുതൽ വൈകിട്ട് 4 മണിവരെയാണ് ബെംഗളൂരു ട്രാഫിക് പോലീസ് നിയന്ത്രണങ്ങൾ ഏര്‍പ്പെടുത്തിയത്. മൈസൂരു റോഡ്, കൊമ്മഘട്ട മെയിൻ റോഡ്, കെംഗേരി സാറ്റലൈറ്റ് ടൗൺ, മഗഡി മെയിൻ റോഡ്, ഇവയുമായി ബന്ധിപ്പിക്കുന്ന സമീപ റോഡുകൾ എന്നിവിടങ്ങളിലാണ് നിയന്ത്രണങ്ങൾ.
രാവിലെ 6 മുതൽ വൈകിട്ട് 4 മണിവരെ നഗരത്തിലെ ചില പ്രധാന റോഡുകളിൽ ഗതാഗതക്കുരുക്ക് രൂക്ഷമാകാൻ സാധ്യതയുണ്ടെന്ന് ട്രാഫിക് പോലീസ് മുന്നറിയിപ്പ് നൽകി. മധു ജങ്ഷൻ മുതൽ കുമ്പളഗോഡ് ജങ്ഷൻ വരെയുള്ള മൈസൂരു റോഡ്,സോംപുര ടോൾ മുതൽ മഗഡി മെയിൻ റോഡ് ജങ്ഷൻ വരെയുള്ള നൈസ് റോഡ്, ചള്ളഘട്ട മെയിൻ റോഡ്, കെംഗേരി സാറ്റലൈറ്റ് ടൗണിലെ റെയിൻബോ ബ്രിഡ്ജ് മുതൽ കൊമ്മഘട്ട ഭാഗത്തേക്കുള്ള റോഡ് എന്നിവിടങ്ങളിൽ കനത്ത ഗതാഗതക്കുരുക്കിന് സാധ്യതയുള്ളതിനാൽ ഈ വഴികളിലൂടെ പോകാൻ ഉദ്ദേശിക്കുന്നവർ കഴിയുന്നതും യാത്ര മുൻകൂട്ടി ആസൂത്രണം ചെയ്യുകയും ബദൽ മാർഗങ്ങൾ തിരഞ്ഞെടുക്കുകയും ചെയ്യണമെന്ന് ട്രാഫിക് പോലീസ് നിർദേശിച്ചു.
ചരക്കുവാഹനങ്ങൾക്ക് നിരോധനം: മാരിഗോൾഡ് സ്കൂൾ ജങ്ഷൻ മുതൽ ഭീമനകുപ്പെ ജങ്ഷൻ വരെയുള്ള ഭാഗത്ത് എല്ലാ ചരക്കുവാഹനങ്ങൾക്കും നിരോധനം ഏർപ്പെടുത്തിയിട്ടുണ്ട്. ഈ ഭാഗത്തേക്ക് പോകേണ്ട വാഹനങ്ങൾ മൈസൂരു മെയിൻ റോഡ് വഴി ചള്ളഘട്ട മെട്രോ സ്റ്റേഷനിലെത്തി അവിടെ നിന്ന് നൈസ് റോഡ് വഴി പോകണമെന്ന് ട്രാഫിക് പോലീസ് അറിയിച്ചു. കൊമ്മഘട്ട ജങ്ഷൻ (കെംഗേരി ക്ലബ്) മുതൽ ഹോസബ്യരോഹള്ളി ഗ്രാമത്തിലേക്കുള്ള പെരിഫറൽ റോഡിലും ചരക്കുവാഹനങ്ങൾക്ക് പ്രവേശനമുണ്ടാകില്ല. ഹോസകേരേഹള്ളി ഭാഗത്തേക്ക് പോകുന്ന വാഹനങ്ങൾ വിശ്വേശ്വരയ്യ ലേഔട്ട് റിങ് റോഡ് വഴി ഉള്ളാലിലെത്തി, തുടർന്ന് കെ എൽ ഇ കോളേജ് കടന്ന് മഗഡി മെയിൻ റോഡ് വഴി പോകണമെന്നാണ് നിർദേശം.
SUMMARY: Kempegowda Jayanti; Traffic restrictions in Bengaluru today
