ന്യൂഡൽഹി: മെസേജിങ് പ്ലാറ്റ്ഫോമായ ടെലഗ്രാമിന് വീണ്ടും കുരുക്ക്. പകർപ്പവകാശമുള്ള സിനിമകള്‍, ഓടിടി ഉള്ളടക്കങ്ങള്‍, മറ്റ് ഓഡിയോ-വിഷ്വല്‍ മെറ്റീരിയലുകള്‍ എന്നിവ വ്യാപകമായി പ്രചരിപ്പിക്കുന്നതിനെതിരെ 15 ദിവസത്തിനകം നടപടിയെടുക്കേണ്ടിവരും. കേന്ദ്ര സർക്കാർ ടെലഗ്രാമിന് ഇതുസംബന്ധിച്ച നോട്ടീസ് നല്‍കി.
വാർത്താവിതരണ – പ്രക്ഷേപണ് മന്ത്രാലയമാണ് ശനിയാഴ്ച ടെലഗ്രാമിന് നോട്ടീസ് നല്‍കിയത്. പകർപ്പവകാശമുള്ള സിനിമകളും നിയമവിരുദ്ധമായ ഓഡിയോ-വിഷ്വല്‍ കണ്ടന്റുകളും കണ്ടെത്തുന്നതിനും റിപ്പോർട്ട് ചെയ്യുന്നതിനും അവയുടെ ലഭ്യത തടയുന്നതിനും അവ നീക്കം ചെയ്യുന്നതിനും സംവിധാനം ശക്തിപ്പെടുത്തണമെന്ന് മന്ത്രാലയം ടെലിഗ്രാമിനോട് നിർദേശിച്ചു.
ഇന്ത്യയുടെ സിനിമാ വ്യവസായം, ഓടിടി പ്ലാറ്റ്ഫോമുകള്‍, നിർമ്മാതാക്കള്‍, വിതരണക്കാർ, ബ്രോഡ്കാസ്റ്റർമാർ തുടങ്ങിയവരെ സംരക്ഷിക്കുന്നതിനാണ് കേന്ദ്ര നടപടി. ആവർത്തിച്ച്‌ നിയമലംഘനം നടത്തുന്ന ചാനലുകള്‍, ഗ്രൂപ്പുകള്‍, ബോട്ടുകള്‍, അക്കൗണ്ടുകള്‍, അഡ്മിനിസ്‌ട്രേറ്റർമാർ, ബന്ധപ്പെട്ട സ്ഥാപനങ്ങള്‍ എന്നിവയ്‌ക്കെതിരെ നടപടിയെടുക്കാനും ടെലഗ്രാമിന് നിർദ്ദേശം നല്‍കിയിട്ടുണ്ട്.
SUMMARY: Central Government issues notice to Telegram for distributing movies and OTT content
