ഡല്ഹി: ആക്ഷേപഹാസ്യ കൂട്ടായ്മയായ ‘കോക്രോച്ച് ജനതാ പാര്ട്ടി’യുടെ (സി.ജെ.പി.) എക്സ് (ട്വിറ്റര്) അക്കൗണ്ടിന് ഏര്പ്പെടുത്തിയ വിലക്ക് നീക്കാന് ഡല്ഹി ഹൈക്കോടതി ഉത്തരവിട്ടു. സി.ജെ.പി. സ്ഥാപകന് അഭിജിത് ദീപ്കെ സമര്പ്പിച്ച ഹര്ജി പരിഗണിക്കവെയാണ് ജസ്റ്റിസ് സ്വര്ണകാന്ത് ശര്മ്മയുടെ ബെഞ്ചിന്റെ നിര്ണ്ണായക ഉത്തരവ്. ജൂണ് 21-ന് നടന്ന നീറ്റ് പുനപ്പരീക്ഷയ്ക്ക് മുന്നോടിയായി മേയ് മാസത്തിലാണ് കേന്ദ്രസര്ക്കാരിന്റെ നിര്ദ്ദേശപ്രകാരം സി.ജെ.പി.യുടെ അക്കൗണ്ട് എക്സ് പ്ലാറ്റ്ഫോം താല്ക്കാലികമായി വിലക്കിയത്.
പരീക്ഷാ സമയത്ത് വിദ്യാര്ഥികള്ക്കും രക്ഷിതാക്കള്ക്കും ഇടയില് അനാവശ്യമായ ആശയക്കുഴപ്പങ്ങള് ഉണ്ടാകാതിരിക്കാനാണ് അക്കൗണ്ട് താല്ക്കാലികമായി വിലക്കിയതെന്ന് സോളിസിറ്റര് ജനറല് തുഷാര് മേത്ത കോടതിയെ അറിയിച്ചിരുന്നു. എന്നാല് നീറ്റ് പുനപ്പരീക്ഷ പൂര്ത്തിയായ സാഹചര്യത്തില് ഇനി വിലക്ക് തുടരേണ്ടതില്ലെന്ന് കോടതി നിരീക്ഷിച്ചു.
ഇതിന്റെ അടിസ്ഥാനത്തില് സി.ജെ.പി.യുടെ എക്സ് അക്കൗണ്ട് വിലക്കിക്കൊണ്ടുള്ള ഉത്തരവ് റദ്ദാക്കാനും അക്കൗണ്ട് അടിയന്തരമായി തിരികെ നല്കാനും കോടതി നിര്ദ്ദേശിക്കുകയായിരുന്നു. മേയ് 15-ന് ഇന്ത്യയുടെ മുന് ചീഫ് ജസ്റ്റിസ് സൂര്യകാന്ത് തൊഴിലില്ലാത്ത യുവാക്കളെ പാറ്റകളോട് ഉപമിച്ച വാര്ത്ത പുറത്തുവന്നിരുന്നു. ഇതില് പ്രതിഷേധിച്ചും വിഷയത്തെ പരിഹസിച്ചും രൂപംകൊണ്ട ഒരു ആക്ഷേപഹാസ്യ കൂട്ടായ്മയാണ് കോക്രോച്ച് ജനതാ പാര്ട്ടി.
ആം ആദ്മി പാര്ട്ടിയുടെ മുന് സോഷ്യല് മീഡിയ സ്ട്രാറ്റജിസ്റ്റായ അഭിജിത് ദീപ്കെയാണ് ഈ കൂട്ടായ്മയ്ക്ക് പിന്നില് പ്രവര്ത്തിക്കുന്നത്. മേയ് 21-ന് സി.ജെ.പി.യുടെ ആദ്യത്തെ എക്സ് അക്കൗണ്ട് ഇന്ത്യയില് വിലക്കിയെങ്കിലും തൊട്ടുപിന്നാലെതന്നെ ‘കോക്രോച്ച് ഈസ് ബാക്ക്’ എന്ന പേരില് പുതിയ അക്കൗണ്ട് പ്രത്യക്ഷപ്പെടുകയായിരുന്നു. നിലവില് 2.27 ലക്ഷത്തിലധികം ഫോളോവേഴ്സ് ഈ എക്സ് അക്കൗണ്ടിനുണ്ട്.
SUMMARY: Ban on Cockroach Janata Party’s X account lifted
