ബെംഗളൂരു: വർത്തൂർ മലയാളി അസോസിയേഷൻ (വിഎംഎ) സംഘടിപ്പിക്കുന്ന ഓണാഘോഷം ‘നമ്മ ഓണം 2026’ ഓഗസ്റ്റ് 15, 16 തീയതികളിൽ തീയതികളിൽ വർത്തൂരിലെ മധുരശ്രീ കോൺവെൻഷൻ സെന്ററിൽ വിപുലമായ പരിപാടികളോടെ നടക്കും. മഹാദേവപുര എം.എൽ.എ. ചടങ്ങിൽ മുഖ്യാതിഥിയായി പങ്കെടുക്കും. രണ്ട് ദിവസങ്ങളിലായി നടക്കുന്ന ഓണാഘോഷം മലയാളികളുടെ ഐക്യവും കേരളത്തിന്റെ തനത് കലാ-സാംസ്കാരിക പാരമ്പര്യവും വിളിച്ചോതുന്ന വേദിയായി മാറുമെന്ന് സംഘാടകർ അറിയിച്ചു.
15-ന് വിവിധ മത്സരങ്ങളും വിനോദപരിപാടികളും അരങ്ങേറും. പൂക്കളം, ചിത്രരചന, പാചകം തുടങ്ങിയ മത്സരങ്ങൾക്കൊപ്പം പരമ്പരാഗത ഓണക്കളികളും ആവേശകരമായ വടംവലി മത്സരവും സംഘടിപ്പിക്കും. കുട്ടികൾക്കായി പ്രത്യേക ഫാൻസി ഡ്രസ് മത്സരവും ഉണ്ടായിരിക്കും. ആഘോഷങ്ങൾക്ക് കൂടുതൽ ആവേശം പകരുന്നതിനായി രാത്രി ഡിജെ, വാട്ടർ ഡ്രം പരിപാടിയും ഒരുക്കിയിട്ടുണ്ട്.
16-ന് വൈവിധ്യമാർന്ന കലാപരിപാടികളും വിപുലമായ ഓണസദ്യയും നടക്കും. തിരുവാതിര, മാർഗംകളി, കൈകൊട്ടിക്കളി തുടങ്ങിയ കേരളീയ കലാരൂപങ്ങൾക്കൊപ്പം വിഎംഎ ജൂനിയർ തിരുവാതിരയും അരങ്ങേറും. തുടർന്ന് രംഗപൂജയും തീം ഡാൻസും നടക്കും. വിവിധ മത്സരങ്ങളിലെ വിജയികൾക്കുള്ള സമ്മാനദാന ചടങ്ങും ഇതോടനുബന്ധിച്ച് സംഘടിപ്പിക്കും. ഓണസദ്യയും അന്നേദിവസം ഒരുക്കിയിട്ടുണ്ട്. പ്രശസ്ത പ്ലേബാക്ക് ഗായിക ദുർഗാ വിശ്വനാഥ്, ഗായകൻ അരവിന്ദ് നായർ, കലാഭവൻ പ്രതീഷ് എന്നിവർ നയിക്കുന്ന സംഗീത വിരുന്നും ഉണ്ടായിരിക്കും. വിഎംഎ സംഘടിപ്പിച്ച ബാഡ്മിന്റൺ ടൂർണമെന്റിലെ വിജയികൾക്കുള്ള സമ്മാനദാനവും നടക്കും.
SUMMARY: Varthur Malayali Association ‘Namma Onam 2026; on August 15th and 16th
