രാംപൂര്‍ഹാട്ട്: പശ്ചിമ ബംഗാള്‍ നിയമസഭ മുന്‍ ഡെപ്യൂട്ടി സ്പീക്കറും തൃണമൂല്‍ കോണ്‍ഗ്രസ് (ടി.എം.സി) മുതിര്‍ന്ന നേതാവുമായ ആശിഷ് ബാനര്‍ജിയെ ബീര്‍ഭൂം ജില്ലയിലെ പാര്‍ട്ടി ഓഫീസില്‍ തൂങ്ങിമരിച്ച നിലയില്‍ കണ്ടെത്തി. രാംപൂര്‍ഹാട്ടിലെ വസതിക്ക് സമീപമുള്ള പാര്‍ട്ടി ഓഫീസിലാണ് ഞായറാഴ്ച രാവിലെ ഇദ്ദേഹത്തെ മരിച്ച നിലയില്‍ കണ്ടെത്തിയതെന്നും, മുറിയില്‍ നിന്ന് ആത്മഹത്യക്കുറിപ്പ് എന്ന് സംശയിക്കുന്ന കുറിപ്പ് ലഭിച്ചതായും പോലീസ് അറിയിച്ചു.
കുടുംബാംഗങ്ങളുടെ മൊഴി പ്രകാരം അര്‍ദ്ധരാത്രി വരെ വീട്ടുകാരുമായി സംസാരിച്ചിരുന്ന ആശിഷ്, പിന്നീട് ഉറങ്ങാന്‍ കിടക്കുകയായിരുന്നു. രാവിലെ അയല്‍വാസികളും കുടുംബാംഗങ്ങളും ചേര്‍ന്ന് പരിശോധിച്ചപ്പോഴാണ് പാര്‍ട്ടി ഓഫീസിന്റെ അടഞ്ഞുകിടന്ന മുറിക്കുള്ളില്‍ മൃതദേഹം കണ്ടത്. തുടര്‍ന്ന് രാംപൂര്‍ഹാട്ട് പോലീസ് സ്ഥലത്തെത്തി മൃതദേഹം ഇന്‍ക്വസ്റ്റ് നടപടികള്‍ക്ക് ശേഷം പോസ്റ്റ്മോര്‍ട്ടത്തിനായി അയച്ചു.
മരണത്തിലേക്ക് നയിച്ച കൃത്യമായ കാരണം വ്യക്തമായിട്ടില്ലെന്നും അന്വേഷണം ആരംഭിച്ചതായും പോലീസ് അറിയിച്ചു. 2001 മുതല്‍ 2026 വരെ രാംപൂര്‍ഹാട്ട് മണ്ഡലത്തെ പ്രതിനിധീകരിച്ച എം.എല്‍.എയായിരുന്ന ആശിഷ് ബാനര്‍ജി, മമത ബാനര്‍ജി മന്ത്രിസഭയില്‍ സ്‌കൂള്‍ വിദ്യാഭ്യാസ, കൃഷി വകുപ്പ് മന്ത്രിയായും സേവനമനുഷ്ഠിച്ചിട്ടുണ്ട്.
എന്നാല്‍ കഴിഞ്ഞ നിയമസഭാ തിരഞ്ഞെടുപ്പില്‍ ബി.ജെ.പി സ്ഥാനാര്‍ത്ഥിയോട് പരാജയപ്പെട്ടതിന് ശേഷം സജീവ രാഷ്ട്രീയത്തില്‍ നിന്ന് മാറിനില്‍ക്കുകയായിരുന്നു. പോസ്റ്റ്മോര്‍ട്ടം റിപ്പോര്‍ട്ടും മുറിയില്‍ നിന്ന് ലഭിച്ച കുറിപ്പും പുറത്തുവരുന്നതോടെ മരണത്തില്‍ കൂടുതല്‍ വ്യക്തത വരുമെന്ന പ്രതീക്ഷയിലാണ് പോലീസ്.
SUMMARY: Former West Bengal Deputy Speaker Ashish Banerjee found hanging
