ബെംഗളൂരു: തന്റെ മണ്ഡലത്തെ വരൾച്ചബാധിത പ്രദേശമായി പ്രഖ്യാപിക്കാത്തതിൽ പ്രതിഷേധിച്ച് കോൺഗ്രസ് എംഎൽഎ രാജിവെച്ചു. വിജയപുര ജില്ലയിലെ ഇന്ദി എംഎല്എ യശ്വന്തരായ ഗൗഡ പാട്ടീലാണ് നിയമസഭാംഗത്വം രാജിവെച്ചത്. സ്പീക്കർ ജി.എസ്. പാട്ടീലിനാണ് ഗൗഡ രാജിക്കത്ത് നൽകിയത്. സംസ്ഥാനത്ത് വരൾച്ചബാധിതപ്രദേശങ്ങൾ പ്രഖ്യാപിച്ചപ്പോൾ തന്റെ മണ്ഡലത്തെ അവഗണിച്ചെന്നാണ് യശ്വന്ത്രായ ഗൗഡ പാട്ടീൽ ആരോപിച്ചത്. ഇന്ദി, ചഡച്ചൻ എന്നീ പ്രദേശങ്ങളെ വരൾച്ചാ ബാധിത പട്ടികയിൽ ഉൾപ്പെടുത്തണമെന്ന് സർക്കാരിനോട് പലതവണ അഭ്യർത്ഥിച്ചെങ്കിലും തന്റെ അപേക്ഷകൾ പരിഗണിക്കപ്പെട്ടില്ലെന്ന് പാട്ടീൽ പറഞ്ഞു.
ഖാരിഫ് സീസണിൽ വേനൽമഴ ലഭിച്ചയുടൻ കർഷകർ കൃഷിയിറക്കിയെങ്കിലും കൊടുംവരൾച്ചയെത്തുടർന്ന് കുടിവെള്ളംപോലും ലഭിക്കാത്ത അവസ്ഥയുണ്ടായി. അവരോടു മറുപടി പറയാൻ കഴിയാത്തതിനാലാണ് രാജിയെന്നും യശ്വന്തരായഗൗഡ രാജിക്കത്തിൽ സൂചിപ്പിച്ചു. ഇതേ വിഷയമുന്നയിച്ച് ഓഗസ്റ്റ് 28ന് മുഖ്യമന്ത്രി ഡി.കെ. ശിവകുമാറിനും ഉപമുഖ്യമന്ത്രി ജി പരമേശ്വരയ്ക്കും ഗൗഡ നിവേദനം നൽകിയിരുന്നു.
അതേസമയം, നടപടിക്രമങ്ങൾ പാലിക്കാതെ സമർപ്പിച്ച രാജി സ്വീകരിച്ചിട്ടില്ലെന്ന് സ്പീക്കർ അറിയിച്ചു. ഒട്ടേറെ എം.എൽ.എ.മാർ തങ്ങളുടെ മണ്ഡലത്തിലെ പ്രദേശങ്ങൾ വരൾച്ചബാധിതമായി പ്രഖ്യാപിക്കണമെന്ന് ആവശ്യപ്പെട്ടിട്ടുണ്ടെന്നും ഇന്ദി എം.എൽ.എ. വൈകാരികമായി എടുത്ത നടപടിയാകാമെന്നും അദ്ദേഹത്തെ അനുനയിപ്പിച്ചിട്ടുണ്ടെന്നും മുഖ്യമന്ത്രി ശിവകുമാർ പ്രതികരിച്ചു.
സംസ്ഥാനമൊട്ടാകെ 188 താലൂക്കുകളാണ് സർക്കാർ വരൾച്ചബാധിതമായി പ്രഖ്യാപിച്ചത്. വിജയപുര ജില്ലയിലെ ഇന്ദി, ചാന്ദ്ചൻ ഒഴികെ 13 താലൂക്കുകൾ ഇതിലുൾപ്പെടും. എന്നാൽ, പട്ടിക പൂർണമല്ലെന്ന് ഉപമുഖ്യമന്ത്രി കഴിഞ്ഞദിവസം പറഞ്ഞിരുന്നു.
നേരത്തെ മന്ത്രിസഭ വികസന വേളയിൽ മന്ത്രി സ്ഥാനം നിഷേധിക്കപ്പെട്ടതിൽ പ്രതിഷേധിച്ച് ഗൗഡ രാജി നൽകിയെങ്കിലും പാർട്ടി നേതൃത്വം ഇടപെട്ടതോടെ പിൻവലിക്കുകയായിരുന്നു.
SUMMARY: Constituency not declared drought-hit; Karnataka Congress MLA resigns.
