ന്യൂഡൽഹി: മുഖ്യതിരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ട് ഡല്‍ഹി ജന്തര്‍ മന്തറിലേക്ക് കോക്രോച്ച് ജനതാ പാര്‍ട്ടി നടത്തുന്ന പ്രതിഷേധം ഇന്ന്. രാവിലെ പത്ത് മണിക്ക് ജന്തര്‍ മന്തറിലേക്ക് എത്തിച്ചേരാനാണ് സിജെപി ആഹ്വാനം ചെയ്തിരിക്കുന്നത്. കേക്രോച്ച് ജനതാപാര്‍ട്ടിക്ക് പുറമേ എസ്എഫ്ഐയും എഐഎസ്എഫും ഐസയും എഎസ്എപിയും പ്രതിഷേധത്തില്‍ പങ്കുചെരുന്നുണ്ട്.
സിജെപി പ്രതിഷേധത്തിന്റെ പശ്ചാത്തലത്തിൽ നിർണായകനീക്കവുമായി ഡൽഹി പോലീസ്. പ്രതിഷേധവേദിയായ ജന്തർ മന്ദറിന് സമീപത്ത് ഇന്റർനെറ്റ് സേവനങ്ങൾ തത്കാലത്തേക്ക് നിർത്തിവെക്കാൻ മൊബൈൽ കമ്പനികളോട് ആവശ്യപ്പെട്ടു. വെള്ളിയാഴ്ച രാത്രി പത്തുമണി മുതൽ 24 മണിക്കൂർ നേരത്തേക്കാണ് ഇന്റർനെറ്റ് സസ്‌പെൻഡ് ചെയ്യുന്നത്.
ഡൽഹിയിലേക്കുള്ള യാത്രകൾ നിയന്ത്രിക്കുന്നതിനായി ഓല, ഊബർ തുടങ്ങിയ ആപ്പ് അധിഷ്ഠിത ടാക്സി സേവനദാതാക്കൾക്ക് നിയന്ത്രണം കൊണ്ടുവന്നിട്ടുണ്ട്. നിയന്ത്രണങ്ങളെക്കുറിച്ച് ടാക്സി ഓപ്പറേറ്റർമാർക്ക് മുന്നറിയിപ്പ് നൽകിയിട്ടുണ്ടെന്നും പൊലീസ് ഉദ്യോഗസ്ഥർ പറഞ്ഞു. സെൻട്രൽ ഡൽഹിയിലും പരിസര പ്രദേശങ്ങളിലുമുള്ള ഹോട്ടലുകൾ, ഗസ്റ്റ് ഹൗസുകൾ, മറ്റ് താമസസൗകര്യങ്ങൾ എന്നിവ നിശ്ചിതമായി അടച്ചിടാനോ പുതിയ ബുക്കിങ്ങുകൾ നിയന്ത്രിക്കാനോ നിർദേശിച്ചതായി പൊലീസ് അറിയിച്ചു. ന്യൂഡൽഹി സ്റ്റേഷന് മുൻപിലുള്ള പഹാർഗഞ്ചിലെ ഹോട്ടൽ ഉടമകൾക്ക് പുതിയ ബുക്കിങ്ങുകൾ സ്വീകരിക്കരുതെന്ന് നിർദേശം നൽകിയതായാണ് വിവരം.
ദേശീയ തലസ്ഥാനത്ത് വിന്യേചിച്ചിരിക്കുന്ന സെൻട്രൽ ആംഡ് പോലീസ് ഫോഴ്സിന്റെ (CAPF) ആകെ അംഗബലം ഏകദേശം 26,000 ഉദ്യോഗസ്ഥരായി ഉയർന്നു. ഈ സുരക്ഷാ നടപടികളുടെ ഭാഗമായി ഹോം മിനിസ്ട്രി സി.എ.പി.എഫിന്റെ 221 അധിക കമ്പനികളെയാണ് അനുവദിച്ചിരിക്കുന്നത്. ഡൽഹി പോലീസിനൊപ്പം നിലവിലുണ്ടായിരുന്ന 110 സി.എ.പി.എഫ് കമ്പനികൾക്ക് പുറമെയാണിത്. സി.ആർ.പി.എഫ് (സെൻട്രൽ റിസർവ് പോലീസ് ഫോഴ്സ്): പശ്ചിമ ബംഗാൾ, ഛത്തീസ്ഗഡിലെ മുൻ നക്സൽ ബാധിത പ്രദേശങ്ങൾ എന്നിവിടങ്ങളിൽ നിന്നുള്ളവരുൾപ്പെടെ 85 കമ്പനികൾ (ഏകദേശം 7,000 മുതൽ 8,500 വരെ ഉദ്യോഗസ്ഥർ). ഔദ്യോഗിക ആയുധങ്ങൾ, ലഹള വിരുദ്ധ ഉപകരണങ്ങൾ, പൂർണ്ണമായ വെടിക്കോപ്പുകൾ എന്നിവയുമായാണ് ഇവരെ സജ്ജമാക്കിയിരിക്കുന്നത്.
SUMMARY: CJP campaigns for Gyanesh’s resignation; protest at Jantar Mantar today; massive security arrangements in Delhi.
