ഡല്‍ഹി: ബംഗ്ലാദേശില്‍ ജനകീയ പ്രക്ഷോഭത്തെ തുടർന്ന് പുറത്താക്കപ്പെട്ട് ഇന്ത്യയില്‍ അഭയം തേടിയ മുൻ പ്രധാനമന്ത്രി ഷെയ്ഖ് ഹസീന മാതൃരാജ്യത്തേക്ക് മടങ്ങാൻ ഒരുങ്ങുന്നു. പുതിയ പാസ്‌പോർട്ടിനായി ഡല്‍ഹിയിലെ ബംഗ്ലാദേശ് എംബസിയില്‍ ഷെയ്ഖ് ഹസീന അപേക്ഷ നല്‍കി. ബംഗ്ലാദേശിലെ ഇടക്കാല സർക്കാർ ഷെയ്ഖ് ഹസീനയുടെ പാസ്‌പോർട്ടും തിരിച്ചറിയല്‍ രേഖകളും മരവിപ്പിച്ച സാഹചര്യത്തിലാണ് പുതിയ പാസ്‌പോർട്ടിനായി അപേക്ഷ നല്‍കിയിരിക്കുന്നത്.
ഡിസംബറില്‍ ബംഗ്ലാദേശിലേക്ക് മടങ്ങുമെന്ന് ഷെയ്ഖ് ഹസീന നേരത്തെ പ്രഖ്യാപിച്ചിരുന്നു. 2024 ആഗസ്റ്റില്‍ അധികാരം നഷ്ടപ്പെട്ടതിനെത്തുടർന്ന് ഇന്ത്യയിലേക്ക് പലായനം ചെയ്തതിനുശേഷം ആദ്യമായാണ് ഷെയഖ് ഹസീന ഔദ്യോഗിക നീക്കം നടത്തുന്നത്. ലണ്ടൻ ആസ്ഥാനമായി പ്രവർത്തിക്കുന്ന മാട്രിക്സ് ചേംബേഴ്സിലെ അഭിഭാഷകർ തിങ്കളാഴ്ച ഡല്‍ഹിയിലെ ബംഗ്ലാദേശ് എംബസിയിലെ ആക്ടിങ് ഹൈക്കമ്മീഷണർ പ്രീതി റഹ്മാന് കത്ത് സമർപ്പിച്ചതായാണ് റിപ്പോർട്ട്.
ബംഗ്ലാദേശിലേക്ക് മടങ്ങുന്നതിനുള്ള നടപടികള്‍ സുഗമമാക്കാൻ ആവശ്യമായ യാത്രാരേഖകളും തിരിച്ചറിയല്‍ രേഖകളും അനുവദിക്കണമെന്നാണ് കത്തിലെ പ്രധാന ആവശ്യം. ബംഗ്ലാദേശ് പൗരയെന്ന നിലയില്‍ ഹസീനക്ക് ഈ രേഖകള്‍ ലഭിക്കാൻ അർഹതയുണ്ടെന്നും അന്താരാഷ്ട്ര മനുഷ്യാവകാശ ചട്ടക്കൂടുകള്‍ പ്രകാരമുള്ള അവകാശങ്ങളും ബാധ്യതകളും പരിഗണിക്കണമെന്നും കത്തില്‍ ചൂണ്ടിക്കാട്ടിയിട്ടുണ്ട്.
SUMMARY: Moves to return to Bangladesh; Sheikh Hasina has applied for a new passport
