ബെംഗളൂരു: ബെംഗളൂരുവിലെ നമ്മ മെട്രോയുടെ പിങ്ക് ലൈൻ എലിവേറ്റഡ് പാത നവംബർ 13-ന് ഉദ്ഘാടനം ചെയ്യും. പ്രധാനമന്ത്രി നരേന്ദ്ര മോദി പാത ഉദ്ഘാടനം ചെയ്യുമെന്നാണ് റിപ്പോർട്ടുകൾ. പുതിയ പാത പ്രവർത്തനസജ്ജമാകുന്നതോടെ നഗരത്തിലെ മെട്രോ ശൃംഖല 100 കിലോമീറ്റർ പിന്നിടും.
കലേന അഗ്രഹാര മുതൽ തവരക്കരെ വരെയുള്ള 7.5 കിലോമീറ്റർ ദൈർഘ്യമുള്ള എലിവേറ്റഡ് പാതയാണ് ആദ്യഘട്ടത്തിൽ തുറന്നുകൊടുക്കുന്നത്. കലേന അഗ്രഹാര, ഹുളിമാവ്, ഐ.ഐ.എം.ബി., ജെ.പി. നഗർ നാലാം ഘട്ടം, ജയദേവ ആശുപത്രി, രാഗിഗുഡ്ഡ, തവരക്കരെ എന്നിവയാണ് ഈ ഭാഗത്തെ ഏഴ് സ്റ്റേഷനുകൾ.
പിങ്ക് ലൈൻ പ്രവർത്തനം ആരംഭിക്കുന്നതോടെ ബെംഗളൂരുവിലെ മെട്രോ ശൃംഖലയുടെ പ്രവർത്തന ദൈർഘ്യം ഏകദേശം 103.6 കിലോമീറ്ററായി ഉയരും. ജയദേവ ആശുപത്രി സ്റ്റേഷനിൽ യെല്ലോ ലൈനുമായി ബന്ധിപ്പിക്കാനാകുമെന്നതും യാത്രക്കാർക്ക് വലിയ നേട്ടമാകും. പ്രത്യേകിച്ച് ബന്നാർഘട്ട റോഡ്, ഹുളിമാവ്, ജെ.പി. നഗർ തുടങ്ങിയ മേഖലകളിലെ യാത്രക്കാർക്ക് പുതിയ പാത ഏറെ പ്രയോജനപ്പെടുമെന്നാണ് പ്രതീക്ഷ. നഗരത്തിലെ ഗതാഗതക്കുരുക്ക് കുറയ്ക്കുന്നതിനും സ്വകാര്യ വാഹനങ്ങളെ ആശ്രയിക്കുന്നത് കുറയ്ക്കുന്നതിനും പദ്ധതി സഹായകമാകുമെന്നാണ് വിലയിരുത്തൽ.
SUMMARY: Metro Pink Line to be inaugurated on November 13; expected to bring relief to Bengaluru’s traffic congestion.
