വാഷിംഗ്‌ടൺ: എയർ ട്രാഫിക് കൺട്രോൾ കേന്ദ്രങ്ങളിലുണ്ടായ ആശയവിനിമയ തകരാറിനെ തുടർന്ന് അമേരിക്കയിലെ എല്ലാ വിമാന സർവീസുകളും ഫെഡറൽ ഏവിയേഷൻ അഡ്‌മിനിസ്ട്രേഷൻ (എഫ്എഎ) നിർത്തിവച്ചു. വെള്ളിയാഴ്‌ച ഉച്ചകഴിഞ്ഞാണ് വിമാനസർവീസുകൾ നിർത്തിവച്ചത്. ഫ്ലൈറ്റ് ട്രാക്കറായ ഫ്ലൈറ്റ്അവെയറിന്റെ കണക്ക് പ്രകാരം ഏകദേശം 7,000ത്തിലധികം വിമാന സർവീസുകളെ ഇത് ബാധിച്ചു.
അസാധാരണമായ സാഹചര്യങ്ങള്‍ കണക്കിലെടുത്തും യാത്രക്കാരുടെ സുരക്ഷയെ മുന്‍നിര്‍ത്തിയുമാണ് വിമാനങ്ങള്‍ക്ക് താല്‍ക്കാലിക വിലക്ക് ഏര്‍പ്പെടുത്തിയതെന്ന് അധികൃതര്‍ അറിയിച്ചു. ടെലികമ്മ്യൂണിക്കേഷന്‍ തകരാറാണ് വിമാന സര്‍വീസുകള്‍ സ്തംഭിക്കാന്‍ കാരണമെന്ന് ആഭ്യന്തര സുരക്ഷാ സെക്രട്ടറി മാര്‍ക്ക്വെയ്ന്‍ മള്ളിന്‍ പ്രതികരിച്ചു . തകരാറിന്റെ യഥാര്‍ഥ കാരണം കണ്ടെത്തിയിട്ടില്ല. പ്രശ്‌നം പരിഹരിക്കാന്‍ ഏറെ സമയമെടുക്കുമെന്നും ആഭ്യന്തര സുരക്ഷാ സെക്രട്ടറി കൂട്ടിച്ചേര്‍ത്തു.
അമേരിക്കയിലെ 22 റീജണല്‍ എയര്‍ ട്രാഫിക് കണ്‍ട്രോള്‍ സെന്ററുകളെയും ആശയവിനിമയ തകരാര്‍ ബാധിച്ചതായി ഗതാഗത സെക്രട്ടറി ഷോണ്‍ ഡഫി വിശദമാക്കി. അമേരിക്കന്‍ ദേശീയ കാലാവസ്ഥാ വകുപ്പിനെയും രാജ്യവ്യാപക ഇന്റര്‍നെറ്റ്, ആശയവിനിമയ തകരാര്‍ ബാധിച്ചു.
2023 ജനുവരിയില്‍ എഫ്എഎയുടെ പ്രധാന കംപ്യൂട്ടര്‍ സംവിധാനം തകരാറിലായതിനുശേഷം രാജ്യവ്യാപകമായി വിമാന സര്‍വീസുകള്‍ നിര്‍ത്തിവച്ചിരുന്നു. അതിനുമുമ്പ്, 2001 സെപ്റ്റംബര്‍ 11ലെ ഭീകരാക്രമണത്തിനു ശേഷമാണ് അമേരിക്കയില്‍ ഇത്തരമൊരു നടപടിയുണ്ടായത്.
SUMMARY: Communication failure; flight operations in the US come to a halt, 7,000 flights cancelled.
