മുംബൈ: മുംബൈ നഗരത്തിലെ വിവിധ കേന്ദ്രങ്ങളില്‍ ബോംബ് സ്ഫോടനം നടത്തുമെന്ന് ഭീഷണിപ്പെടുത്തിയുള്ള ഇമെയില്‍ ലഭിച്ചതിനെ തുടർന്ന് സുരക്ഷ ശക്തമാക്കി. ഛത്രപതി ശിവാജി മഹാരാജ് രാജ്യാന്തര വിമാനത്താവളം, മേയറുടെ ഓഫിസ്, ബോളിവുഡ് താരം അമിതാഭ് ബച്ചന്റെ വസതിയായ ജല്‍സ, പഞ്ചാബ് നാഷണല്‍ ബാങ്ക് ശാഖ എന്നിവിടങ്ങളിലാണ് സ്ഫോടനം നടത്തുമെന്ന് ഭീഷണി.വ്യാഴാഴ്ച രാവിലെ 10.52നാണ് ഭീഷണി സന്ദേശം ലഭിച്ചത്.
ഉച്ചയ്ക്ക് 1.11ന് മുംബൈയിലെ പി.എൻ.ബി ശാഖയില്‍ സ്ഫോടനം നടത്തുമെന്നായിരുന്നു ഇമെയിലിലെ പരാമർശം. നവംബർ 27, ഡിസംബർ 31 എന്നീ തീയതികളും സന്ദേശത്തിലുണ്ട്. മുംബൈയിലെ ബാങ്കുകള്‍, മഹാലക്ഷ്മി സ്റ്റേഡിയം തുടങ്ങിയ ഇടങ്ങളിലും ആക്രമണം നടത്തുമെന്ന് ഭീഷണിയുണ്ട്. ഖലിസ്ഥാൻ, ‘ഖലിസ്ഥാൻ നാഷണല്‍ ആർമി’ എന്നീ പേരുകളും ഇമെയിലില്‍ പരാമർശിച്ചിട്ടുണ്ട്. ഭീഷണിയുടെ ആധികാരികതയോ സന്ദേശം അയച്ചയാളുടെ വിവരങ്ങളോ ഇതുവരെ വ്യക്തമായിട്ടില്ല. സംഭവത്തില്‍ മുംബൈ പോലീസ് വിശദമായ അന്വേഷണം ആരംഭിച്ചു.
SUMMARY: Threat of a bomb blast in Mumbai; security tightened at the airport and Amitabh Bachchan’s residence
