ബെംഗളൂരു: സംസ്ഥാനത്തെ കൂടുതൽ സർക്കാർ സ്കൂളുകളിൽ പ്രീ-പ്രൈമറി വിദ്യാഭ്യാസം ലഭ്യമാക്കുന്നതിനായി എൽ.കെ.ജി., യു.കെ.ജി. ക്ലാസുകൾ വ്യാപിപ്പിക്കാൻ കർണാടക വിദ്യാഭ്യാസ വകുപ്പ് ഒരുങ്ങുന്നു. നിലവിൽ ഈ സൗകര്യമുള്ള സ്കൂളുകളുടെ എണ്ണം വർധിപ്പിക്കുന്നതിനായി സംസ്ഥാനവ്യാപകമായി സർവേ നടത്താനും സർക്കാർ ആലോചിക്കുന്നുണ്ട്.
നിലവിൽ കർണാടകയിലെ ഏകദേശം 6,000 മുതൽ 7,000 വരെ സർക്കാർ സ്കൂളുകളിൽ എൽ.കെ.ജി., യു.കെ.ജി. ക്ലാസുകൾ പ്രവർത്തിക്കുന്നുണ്ട്. കൂടുതൽ സ്കൂളുകളിലേക്ക് പദ്ധതി വ്യാപിപ്പിക്കുന്നതിന് ആവശ്യമായ അടിസ്ഥാന സൗകര്യങ്ങൾ, വിദ്യാർഥികളുടെ എണ്ണം, രക്ഷിതാക്കളുടെ താൽപര്യം എന്നിവ സർവേയിലൂടെ വിലയിരുത്തും.
സാമ്പത്തികമായി പിന്നാക്കം നിൽക്കുന്ന കുടുംബങ്ങളിലെ കുട്ടികൾക്ക് ചെറുപ്രായത്തിൽത്തന്നെ ഗുണമേന്മയുള്ള പ്രീ-പ്രൈമറി വിദ്യാഭ്യാസം ലഭ്യമാക്കുകയാണ് പദ്ധതിയുടെ പ്രധാന ലക്ഷ്യം. സ്വകാര്യ സ്കൂളുകളെ ആശ്രയിക്കാതെ സർക്കാർ സംവിധാനത്തിൽ തന്നെ കുട്ടികളുടെ ആദ്യകാല വിദ്യാഭ്യാസം ഉറപ്പാക്കാനും ഇതിലൂടെ സാധിക്കുമെന്നാണ് വിദ്യാഭ്യാസ വകുപ്പിന്റെ വിലയിരുത്തൽ.
സർവേയുടെ അടിസ്ഥാനത്തിൽ കൂടുതൽ സ്കൂളുകൾ തിരഞ്ഞെടുക്കുകയും ആവശ്യമായ അധ്യാപകരെയും പഠനസൗകര്യങ്ങളെയും ഒരുക്കുകയും ചെയ്യും.
SUMMARY: Karnataka to strengthen pre-primary education in government schools; LKG, UKG to more schools. classes















