ന്യൂഡല്ഹി: സൗദി അറേബ്യയിലെ നിലവിലെ സുരക്ഷാ സാഹചര്യങ്ങൾ കണക്കിലെടുത്ത് രാജ്യത്തേക്കും തിരിച്ചുമുള്ള എല്ലാ വിമാന സർവീസുകളും നവംബർ 30 വരെ റദ്ദാക്കിയതായി ഇൻഡിഗോ എയർലൈൻസ് അറിയിച്ചു. ജിദ്ദ, മദീന, റിയാദ്, ദമാം എന്നീ നാല് പ്രധാന നഗരങ്ങളിലേക്കുള്ള സർവീസുകളാണ് നവംബർ 30 ഉൾപ്പെടെയുള്ള ദിവസത്തേക്ക് പൂർണ്ണമായും നിർത്തിവച്ചിരിക്കുന്നത്.
നേരത്തെ ജിദ്ദ, മദീന എന്നിവിടങ്ങളിലേക്കും തിരിച്ചുമുള്ള വിമാന സർവിസുകൾ നവംബർ 21 വരെയും റിയാദ്, ദമ്മാം എന്നിവിടങ്ങളിലേക്കുള്ള സർവിസുകൾ നവംബർ 30 വരെയും ഇൻഡിഗോ റദ്ദാക്കിയിരുന്നു.
ടിക്കറ്റ് ബുക്ക് ചെയ്യുന്ന സമയത്ത് നൽകിയിട്ടുള്ള കോൺടാക്റ്റ് വിവരങ്ങൾ വഴി, സർവീസുകൾ റദ്ദാക്കിയ വിവരം യാത്രക്കാരെ അറിയിക്കുന്നുണ്ട്. ഈ സാഹചര്യത്തിൽ യാത്രക്കാർക്ക് കൃത്യമായ വിവരങ്ങൾ നൽകുന്നതിനും ആവശ്യമായ എല്ലാ സഹായങ്ങളും ലഭ്യമാക്കുന്നതിനും തങ്ങൾ പ്രതിജ്ഞാബദ്ധരാണെന്നും ഇൻഡിഗോ പ്രസ്താവനയിൽ അറിയിച്ചു. സാഹചര്യങ്ങൾ ഞങ്ങൾ സൂക്ഷ്മമായി നിരീക്ഷിക്കുകയും വിലയിരുത്തുകയും ചെയ്യുന്നുണ്ട്. യാത്രക്കാരുടെയും ജീവനക്കാരുടെയും സുരക്ഷയ്ക്കാണ് ഞങ്ങൾ ഏറ്റവും ഉയർന്ന മുൻഗണന നൽകുന്നത്- ഇൻഡിഗോ വ്യക്തമാക്കി.
എയര് ഇന്ത്യ എക്സ്പ്രസ്, അകാസ എയര് എന്നിവയും നവംബര് അവസാനം വരെയുള്ള സര്വീസുകള് റദ്ദാക്കിയിട്ടുണ്ട്. എന്നാല് സൗദി ദേശീയ വിമാനക്കമ്പനികളായ സൗദി എയര്ലൈന്സ്, ഫ്ലൈ നാസ് എന്നിവ ഇന്ത്യയിലേക്ക് കൂടുതല് സര്വീസുകള് ആരംഭിച്ചത് പ്രവാസി യാത്രക്കാര്ക്ക് ആശ്വാസം നല്കുന്നുണ്ട്. ഈ രണ്ട് വിമാനക്കമ്പനികളും ജിദ്ദ കോഴിക്കോട് ഡയറക്ട് സര്വീസും ആരംഭിച്ചു.
SUMMARY: security threat; IndiGo cancels flights to and from Saudi Arabia till November 30
















