ബെംഗളൂരു: ബെംഗളൂരു അർബൻ ജില്ലയിൽ പത്ത് ദിവസത്തിനിടെ ലഭിച്ചത് റെക്കോർഡ് മഴ. ജൂണിലെ ആദ്യ 10 ദിവസങ്ങളിൽ ശരാശരിയുടെ ഇരട്ടിയോളം മഴ ഇവിടെ ലഭിച്ചിട്ടുണ്ടെന്ന് കാലാവസ്ഥ നിരീക്ഷണ കേന്ദ്രം (ഐഎംഡി) അറിയിച്ചു. ജൂൺ 2നാണ് സംസ്ഥാനത്ത് കാലവർഷം ആരംഭിച്ചത്. ഇതോടെ ബെംഗളൂരു അർബൻ ജില്ലയിൽ ശരാശരി 106.8 മില്ലിമീറ്റർ മഴയാണ് ലഭിച്ചത്. ഈ കാലയളവിൽ സാധാരണ 56 മില്ലിമീറ്ററാണ് മഴ ലഭിക്കാറുള്ളത്.
അടുത്ത മൂന്ന് ദിവസത്തേക്ക് സാധാരണയിൽ കവിഞ്ഞ മഴ ജില്ലയിൽ തുടരുമെന്ന് ഐഎംഡി അറിയിച്ചു. വടക്കൻ കർണാടക ജില്ലകളിൽ തുടരുന്ന മഴ വരും ദിവസങ്ങളിൽ കനക്കും. ജൂൺ 13 വരെ കനത്ത മഴയ്ക്ക് സാധ്യതയുള്ള നിരവധി ജില്ലകളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. തീരദേശ കർണാടക ജില്ലകൾക്കും സമാനമായ മുന്നറിയിപ്പ് നൽകിയിട്ടുണ്ട്.
കാലാവസ്ഥാ വകുപ്പിന്റെ കണക്കനുസരിച്ച് സംസ്ഥാനത്ത് മൊത്തത്തിൽ ഇത്തവണ പെയ്ത മഴ സാധാരണയക്കാൾ കൂടുതലാണ്. ആകെയുള്ള 31 ജില്ലകളിൽ, 22 ജില്ലകളിലും ജൂൺ 1നും 10നും ഇടയിൽ മുൻ വർഷത്തേക്കാൾ 60 ശതമാനത്തിലധികം മഴയാണ് രേഖപ്പെടുത്തിയിട്ടുള്ളത്. വിജയപുര, ബാഗൽകോട്ട എന്നിവിടങ്ങളിൽ ഇത്തവണ മൂന്നിരട്ടി മഴയാണ് അധികം പെയ്തത്.
TAGS: BENGALURU UPDATES| RAIN UPDATES
SUMMARY: Bengaluru recieves record rainfall within ten days
