ബെംഗളൂരു: ട്രെക്കിംഗിനായി പോകുന്നതിനിടെ ബൈക്കിൽ ലോറിയിടിച്ച് 19 കാരനായ കോളേജ് വിദ്യാർത്ഥി മരിച്ചു. ഒപ്പമുണ്ടായിരുന്ന സുഹൃത്തിന് പരുക്കേറ്റു. ഞായറാഴ്ച പുലർച്ചെ ബെംഗളൂരു തുമകുരു റോഡിലാണ് അപകടമുണ്ടായത്. ക്രൈസ്റ്റ് യൂണിവേഴ്സിറ്റിയിലെ ബി.കോം വിദ്യാർത്ഥിയായ ഭവിഷ്യ ശർമ്മയാണ് (19) മരിച്ചത്.
മാതാപിതാക്കൾ ദുബായിലായതിനാൽ ബെംഗളൂരുവിൽ ഹോസ്റ്റലിൽ താമസിച്ചാണ് ഭവിഷ്യ പഠിക്കുന്നത്. ബൈക്കിൽ ഒപ്പമുണ്ടായിരുന്ന ബി.എസ്സി വിദ്യാർത്ഥിനിയായ അനുഷ്കയ്ക്കാണ് (19) പരുക്കേറ്റത്. ഇവർ ആശുപത്രിയിൽ ചികിത്സയിലാണ്.
കോരമംഗലയിൽ നിന്ന് നാല് ബൈക്കുകളിലായി എട്ട് വിദ്യാർത്ഥികളടങ്ങ സംഘം ശിവഗംഗയിലേക്ക് ട്രെക്കിംഗിനായി പുറപ്പെട്ടതായിരുന്നു. തുമാകുരു റോഡിലെ പാർലെ-ജി ഗേറ്റിന് സമീപം എത്തിയപ്പോൾ ഭവിഷ്യ സഞ്ചരിച്ചിരുന്ന ബൈക്കിന് പിന്നിൽ ലോറിയിടിക്കുകയായിരുന്നു.
അപകടത്തിൽ റോഡിന്റെ വലതുവശത്തേക്ക് വീണ ഭവിഷ്യയുടെ ശരീരത്തിലൂടെ ലോറി കയറിയിറങ്ങുകയായിരുന്നു. സംഭവസ്ഥലത്തുതന്നെ വിദ്യാർത്ഥി മരിച്ചു. ഇടതുവശത്തേക്ക് വീണ അനുഷ്കയ്ക്ക് പരുക്കുകളേറ്റതായി പോലീസ് അറിയിച്ചു. പീന്യ ട്രാഫിക് പോലീസ് സ്ഥലത്തെത്തി പരിശോധന നടത്തി കേസെടുത്തിട്ടുണ്ട്. ലോറി കസ്റ്റഡിയിലെടുത്തിട്ടുണ്ട്.
SUMMARY: Lorry hits bike while on the way to a trekking trip; 19-year-old student dies, friend injured
















