ബെംഗളൂരു: ബെംഗളൂരുവിലെ പ്രധാന കുടിവെള്ള പദ്ധതിയായ കാവേരി അഞ്ചാം ഘട്ടത്തിന് ബുധനാഴ്ച തുടക്കമാകും. നഗരത്തിലെ 110 ഗ്രാമങ്ങളിലുള്ള നാല് ലക്ഷം വീടുകളിലായി 50 ലക്ഷത്തോളം ആളുകൾക്ക് കുടിവെള്ളം ലഭ്യമാക്കുന്നതാണ് പദ്ധതി. 4,336 കോടി രൂപയാണ് പദ്ധതിയുടെ ചെലവ്. മുഖ്യമന്ത്രി സിദ്ധരാമയ്യയും ഡെപ്യൂട്ടി ഡി.കെ. ശിവകുമാറും ചേർന്ന് പദ്ധതി ഉദ്ഘാടനം ചെയ്യും. ഇതോടെ നഗരത്തിലെ എല്ലാ വീട്ടിലും കാവേരി കുടിവെള്ളം ലഭ്യമാകും.
മാണ്ഡ്യയിലെ തോരെകടനഹള്ളിയിൽ മുഖ്യമന്ത്രിയും ഉപമുഖ്യമന്ത്രി ഡി. കെ. ശിവകുമാറും ചേർന്ന് പദ്ധതിയുടെ ഉദ്ഘാടനം നിർവഹിക്കും. പദ്ധതിയുടെ ഭാഗമായി 228 കിലോമീറ്റർ ഡ്രെയിനേജ് പൈപ്പ് ലൈനും 100 എംഎൽഡി മലിനജലം ശുദ്ധീകരിക്കാൻ ശേഷിയുള്ള 13 മലിനജല സംസ്കരണ പ്ലാൻ്റുകളും (എസ്ടിപി) സ്ഥാപിക്കുകയും ചെയ്യും. ജപ്പാൻ ഇൻ്റർനാഷണൽ കോ-ഓപ്പറേഷൻ ഏജൻസിയുമായി സഹകരിച്ച് നടപ്പാക്കുന്ന പദ്ധതി, ബെംഗളൂരുവിലേക്ക് പ്രതിദിനം 775 എംഎൽഡി കാവേരി ജലം അധികമായി നൽകുമെന്നും ഏകദേശം 5 ദശലക്ഷം ആളുകൾക്ക് പ്രയോജനം ചെയ്യുമെന്നും ഉപമുഖ്യമന്ത്രി ഡി. കെ. ശിവകുമാർ പറഞ്ഞു.
2014-ൽ ആസൂത്രണം ചെയ്ത പദ്ധതി യശ്വന്ത്പുർ, ദാസറഹള്ളി, ബൈതരായണപുര, സൗത്ത് ബെംഗളൂരു, മഹാദേവപുര, രാജരാജേശ്വരി നഗർ, കെംഗേരി, ബൊമ്മനഹള്ളി തുടങ്ങിയ പ്രദേശങ്ങൾക്ക് ഗുണം ചെയ്യും. പദ്ധതി അടുത്ത ദശാബ്ദത്തേക്ക് നഗരത്തിൻ്റെ ജല ആവശ്യങ്ങൾ നിറവേറ്റുമെന്നും വാട്ടർ ടാങ്കർ മാഫിയകൾക്കെതിരെ പ്രവർത്തിക്കുമെന്നും ഉപമുഖ്യമന്ത്രി ഡി. കെ. ശിവകുമാർ പറഞ്ഞു.
TAGS: KARNATAKA | CAUVERY PROJECT
SUMMARY: Every household in Bengaluru to get Cauvery drinking water from Wednesday
