വയനാട്: വന്ദുരന്തമുണ്ടായ വയനാട്ടിലെ മുണ്ടക്കൈയില് മേഖലയില് വീണ്ടും ഉരുള്പൊട്ടലെന്ന് സംശയം. വെള്ളരിമലയുടെ താഴ്വാരത്ത് നിന്നും ശക്തമായി വെള്ളമൊഴുകി വരുന്ന സാഹചര്യത്തില് മണ്ണിടിച്ചിലാണോ ഉരുള്പൊട്ടലാണോ എന്ന് വ്യക്തത വരേണ്ടതുണ്ട്. മേഖലയില് നിന്ന് വലിയ ശബ്ദം കേട്ടതായാണ് നാട്ടുകാർ പറയുന്നത്.
ചൂരല്മല-അട്ടമല റോഡ് പൂർണമായി വെള്ളത്തിനടിയിലായി. പുന്നപ്പുഴയില് ചെളിമണ്ണ് കുത്തിയൊലിക്കുകയാണ്. ബെയ്ലി പാലത്തിന് താഴെ മലവെള്ളപ്പാച്ചിലുണ്ട്. മണ്ണിടിച്ചില് എവിടെയെങ്കിലും ഉണ്ടോ എന്ന് പരിശോധിക്കുമെന്ന് അധികൃതർ വിശദമാക്കി. മുണ്ടക്കൈ വനമേഖലയില് നൂറു മില്ലിമീറ്റർ മഴ പെയ്തുവെന്നാണ് ലഭ്യമാകുന്ന സൂചനകള്. ഫയർഫോഴ്സും പോലീസും മേഖലയിലേക്ക് തിരിച്ചു. ചൂരല്മരയില് ശക്തമായ മഴ തുടരുകയാണ്. പുഞ്ചിരിമട്ടത്തും മുണ്ടക്കൈയിലും പരിശോധന നടത്താനാണ് അധികൃതർ ഒരുങ്ങുന്നത്.
ഇന്നലെ വൈകുന്നേരം മുതല് വയനാട്ടില് ശക്തമായ മഴയാണ് പെയ്യുന്നത്. കനത്ത മഴയെ തുടർന്ന് വയനാട്ടിലെ വിവിധ ഭാഗങ്ങളില് ജനജീവിതം പ്രതിസന്ധിയിലായിരിക്കുകയാണ്. ചില ഭാഗങ്ങളില് മണ്ണിടിച്ചിലുണ്ടായോയെന്ന സംശയവും പ്രദേശവാസികള്ക്കുണ്ടായിട്ടുണ്ട്.
SUMMARY: Heavy rain in Wayanad’s Chooralmala; Landslide suspected in Mundakai
