ചിന്നസ്വാമി ദുരന്തം; പൊതുജനങ്ങളോട് തെളിവ് ഹാജരാക്കാൻ നിര്‍ദേശം

ബെംഗളൂരു: റോയൽ ചലഞ്ചേഴ്സിന്റെ വിജയാഘോഷത്തിനിടെ നടന്ന തിക്കിലും തിരക്കിലും 11 പേർ മരിച്ച സംഭവത്തിൽ പൊതുജനങ്ങളോട് തെളിവ് ഹാജരാക്കാൻ അഭ്യർഥിച്ച് ബെംഗളൂരു നഗര ഡെപ്യൂട്ടി കമ്മീഷണര്‍ ജി. ജഗദീഷ. അപകടത്തെക്കുറിച്ച് അറിയാവുന്നവർ അന്വേഷിക്കുന്ന സമിതിക്കു മുൻപാകെ ഹാജരായി തെളിവോ മൊഴി നൽകണമെന്നാണ് അഭ്യർഥന. ഇതിനായി എഴുതി തയാറാക്കിയ സത്യവാങ്മൂലവുമായി കെജി റോഡിലെ ഡെപ്യൂട്ടി കമ്മീഷണറുടെ ഓഫിസിൽ ഇന്നു രാവിലെ 11ന് എത്തിച്ചേരണം.

ആർസിബിയുടെ ഐപിഎൽ വിജയാഘോഷത്തിനിടെ ചിന്നസ്വാമി സ്റ്റേഡിയത്തിലെ 2 പ്രവേശന കവാടങ്ങളിലൂടെ ജനം ഇരച്ചു കയറിയുണ്ടായ അപകടത്തിന്റെ കാരണങ്ങൾ കണ്ടെത്താൻ സംസ്ഥാന സർക്കാരാണ് ജില്ലാ കലക്ടറെ നിയോഗിച്ചത്. നേരത്തേ സംഭവത്തിൽ ആർസിബിക്കും കർണാടക ക്രിക്കറ്റ് അസോസിയേഷനുമെതിരെ കേസെടുത്തിരുന്നു.

SUMMARY: Bengaluru DC asks public to submit evidence  about RCB stampede.