പ്രവാസികൾക്ക് താങ്ങായി നോർക്ക കെയർ ആരോഗ്യ ഇൻഷുറൻസ്; 5 ലക്ഷം രൂപയുടെ ചികിത്സാ സഹായ പദ്ധതി

ബെംഗളൂരു: പ്രവാസികൾക്ക് 5 ലക്ഷം രൂപ വരെ ചികിത്സയ്ക്കും അപകട മരണങ്ങൾക്ക് പത്ത് ലക്ഷം രൂപയും വരെയും നൽകുന്ന ഇൻഷുറൻസ് കേരള സര്‍ക്കാര്‍ നടപ്പാക്കുന്നു. നോർക്ക കെയർ എന്ന് പേരിട്ടിരിക്കുന്ന പ്രവാസി ഇൻഷുറൻസ് നവംബർ 1ന് നിലവിൽ വരും. സെപ്റ്റംബർ 22-ന് മുഖ്യമന്ത്രി പിണറായി വിജയൻ ഇൻഷുറൻസ് ഉദ്ഘാടനംചെയ്യും. അന്നുമുതൽ ഒക്ടോബർ 21 വരെയാണ് അപേക്ഷസ്വീകരിക്കുന്നത്. ആരോഗ്യ ഇൻഷുറൻസിന് ഒപ്പം അപകട ഇൻഷുറൻസ് കൂടിയാണിത്.

നോർക്ക റൂട്ട്‌സ് നടപ്പാക്കുന്ന പദ്ധതിയിൽ വിദേശത്തും രാജ്യത്തിനുള്ളിൽ ഇതരസംസ്ഥാനങ്ങളിലും താമസിക്കുന്ന മലയാളികൾക്കും ചേരാം. നോർക്കയുടെ തിരിച്ചറിയൽ കാർഡ് (എൻആർകെ കാർഡ്) എടുത്തിട്ടുള്ളവർക്കാണ് കെയർ ഇൻഷുറൻസിൽ ചേരാൻ സാധിക്കുന്നത്. നിലവിൽ എൻആർകെ കാർഡില്ലത്തവർക്ക് ഓൺലൈൻ മുഖേന ഇതിന് അപേക്ഷിക്കാം. ഇ-കാർഡ് ലഭിച്ചതിനുശേഷം നോർക്ക കെയറിന് അപേക്ഷ സമർപ്പിക്കാം. എൻആർകെ കാർഡുള്ളവർക്ക് അഞ്ചുലക്ഷം രൂപയുടെ അപകട ഇൻഷുറൻസുണ്ട്. അതിനാൽ നോർക്ക കെയർ ഇൻഷുറൻസുള്ളവർക്ക് ഫലത്തിൽ 15 ലക്ഷം രൂപയുടെ അപകട ഇൻഷുറൻസ് പരിരക്ഷയുണ്ടാകും.

പദ്ധതിയില്‍ ചേരുമ്പോള്‍ നിലവിലുള്ള രോഗങ്ങൾക്ക് പോലും ഇൻഷുറൻസ് ലഭിക്കും എന്നതാണ് നോർക്ക കെയർ പ്രവാസി ഇൻഷുറൻസിനെ വേറിട്ടതാക്കുന്നത്. അഞ്ച് ലക്ഷം രൂപയുടെ വരെ ചികിത്സ. ഭർത്താവും ഭാര്യയും രണ്ട് മക്കളുള്ള (25 വയസ് വരെയുള്ള) കുടുംബത്തിന് ജിഎസ്ടി ഉൾപ്പെടെ 13,275 രൂപയാണ് വാർഷിക പ്രീമിയം. അധികമായി ചേർക്കുന്ന ഒരോ കൂട്ടിക്കും 4,130 രൂപ വീതം നൽകണം. വ്യക്തിഗത ഇൻഷുറൻസ് മാത്രമാണെങ്കിൽ 7,965 രൂപ മതി. ഇന്ത്യയിലുടനീളം 12,000-ത്തിലധികം ആശുപത്രികളിൽ കാഷ്‌ലെസ് ചികിത്സ ലഭ്യമാക്കും.