ബെംഗളൂരു: ഹോസ്റ്റലില് ഉറങ്ങിക്കിടന്ന സഹപാഠികള്ക്ക് നേരെ ഇരുമ്പ് കമ്പി കൊണ്ട് ആക്രമണം നടത്തി ഒന്പതാം ക്ലാസ് വിദ്യാര്ഥി. ആക്രമണത്തില് ഒരു വിദ്യാർഥി കൊല്ലപ്പെട്ടു. ബെല്ലാരിയിലെ ഗുരുകുല റെസിഡെൻഷ്യൽ സ്കൂൾ ഹോസ്റ്റലിൽ കഴിഞ്ഞദിവസം രാത്രിയാണ് സംഭവം. അദവാനി സ്വദേശിയായ ഹേമന്ത് ആണ് കൊല്ലപ്പെട്ടത്. മറ്റ് വിദ്യാര്ഥികള്ക്കും അധ്യാപികക്കും ഹോസ്റ്റല് സെക്യൂരിറ്റിക്കും സംഭവത്തില് പരുക്കേറ്റു. ഇവർ ബെല്ലാരി ബിഐഎംഎസ് ആശുപത്രിയിൽ ചികിത്സയിലാണ്. പാലക്കാട് സ്വദേശിനിയായ അധ്യാപികക്കാണ് പരുക്കേറ്റത്. കുട്ടികളുടെ നിലവിളി കേട്ട് പുറത്തിറങ്ങിയ അധ്യാപികയെ ഇതേ വിദ്യാര്ഥി കടിച്ച് പരുക്കേല്പ്പിക്കുകയായിരൂന്നു.
കൊല്ലപ്പെട്ട ഹേമന്തിന്റെ മൃതദേഹം പോസ്റ്റ്മോർട്ടത്തിനായി ബെല്ലാരി മെഡിക്കൽ കോളജ് ആൻഡ് റിസർച്ച് സെൻ്ററിലേക്ക് അയച്ചു. ആക്രമണത്തിൻ്റെ കാരണം വ്യക്തമല്ലെന്ന് പോലീസ് പറഞ്ഞു. ശനിയാഴ്ച രാത്രി അത്താഴത്തിന് ശേഷം വിദ്യാര്ഥികള് ഉറങ്ങിക്കിടക്കുമ്പോഴാണ് അപ്രതീക്ഷിത ആക്രമണം ഉണ്ടായത്. പ്രതിക്കായി തിരച്ചിൽ തുടരുകയാണെന്ന് പോലീസ് അറിയിച്ചു. അതേസമയം, ലഹരി ഉപയോഗിച്ചാണ് ഒൻപതാംക്ലാസുകാരൻ ആക്രമണം നടത്തിയതെന്ന് കൊല്ലപ്പെട്ട വിദ്യാർഥിയുടെ ബന്ധുക്കൾ ആരോപിച്ചിട്ടുണ്ട്.
SUMMARY: A ninth-grader attacked a school hostel with an iron rod; one student was killed, several people including a Malayali teacher were injured
