ബെംഗളൂരു: സ്വയം നിറയൊഴിച്ച്‌ മരണപ്പെട്ട കോണ്‍ഫിഡന്റ് ഗ്രൂപ്പ് മേധാവി സി ജെ റോയിയുടെ (56) സംസ്കാരം നടന്നു. ബെംഗളൂരു ബന്നാർഘട്ട റോഡിലുള്ള കോണ്‍ഫിഡന്റ് ഗ്രൂപ്പിന്റെ നാചേഴ്സ് ലക്ഷ്വറിയിലാണ് സംസ്കാരച്ചടങ്ങുകള് പൂർത്തിയായത്. കുടുംബാംഗങ്ങളുടെയും അടുത്ത ബന്ധുക്കളുടെയും സാന്നിദ്ധ്യത്തിലായിരുന്നു സംസ്കാരച്ചടങ്ങുകള് നടന്നത്.
വെള്ളിയാഴ്‌ച വൈകിട്ട് ബെംഗളൂരുവിലെ റിച്ച്‌മണ്ട് സർക്കിളിലെ കോണ്‍ഫിഡന്റ് ഗ്രൂപ്പ് ഓഫീസില്‍ കേന്ദ്ര ഏജൻസികളുടെ റെയ്‌ഡ് നടക്കുന്നതിനിടെയാണ് റോയ് സ്വയം വെടിവച്ച്‌ മരിച്ചത്. സംഭവം നടന്നയുടൻ അദ്ദേഹത്തെ എച്ച്‌എസ്‌ആർ ലെയൗട്ടിലുള്ള നാരായണ ആശുപത്രിയിലെത്തിച്ചെങ്കിലും മരണപ്പെടുകയായിരുന്നു. ആദായനികുതി ഉദ്യോഗസ്ഥരുടെ നിരന്തരമായ ചോദ്യം ചെയ്യലും സമ്മർദ്ദവുമാണ് സി.ജെ. റോയിയെ മരണത്തിലേക്ക് നയിച്ചതെന്ന ഗൗരവകരമായ ആരോപണമാണ് കുടുംബം ഉന്നയിക്കുന്നത്.
ഡിസംബർ മുതല്‍ നടന്ന പരിശോധനകള്‍ക്ക് പിന്നാലെ ജനുവരി 30-ന് വീണ്ടും ഉദ്യോഗസ്ഥർ എത്തിയപ്പോഴാണ് അദ്ദേഹം സ്വയം വെടിയുതിർത്തത്. മരണത്തിന് മുമ്പായി സഹോദരന് അയച്ച ‘ടൂ മച്ച്‌ ട്രബിള്‍’ എന്ന സന്ദേശം ഉദ്യോഗസ്ഥരില്‍ നിന്നുള്ള മാനസിക സമ്മർദ്ദത്തിന്റെ തെളിവായി കുടുംബം ചൂണ്ടിക്കാട്ടുന്നു. സംഭവത്തില്‍ കർണാടക സിഐഡി പ്രത്യേക സംഘത്തെ നിയോഗിച്ച്‌ അന്വേഷണം ഊർജ്ജിതമാക്കിയിട്ടുണ്ട്.
SUMMARY: C.J. Roy’s body cremated
