ഷിംല: ഗാന്ധി കുടുംബത്തെക്കുറിച്ചുള്ള വിവാദ സമൂഹമാധ്യമ പോസ്റ്റുകള്‍ക്ക് പിന്നാലെ ബിജെപി എംപിയും നടിയുമായ കങ്കണ റണാവത്തിനെതിരെ ഹിമാചല്‍ പ്രദേശ് പോലീസ് കേസെടുത്തു. മുൻ പ്രധാനമന്ത്രിമാരായ ഇന്ദിരാഗാന്ധി, രാജീവ് ഗാന്ധി എന്നിവരും രാജീവിന്റെ മകൻ സഞ്ജയ് ഗാന്ധിയുടെയും മരണത്തെക്കുറിച്ചുള്ള കങ്കണയുടെ പോസ്റ്റുകളില്‍ പ്രകോപനപരമായ പരാമർശങ്ങള്‍ ഉണ്ടെന്ന് ആരോപിച്ച്‌ ഷിംല നിവാസിയായ അതുല്‍ ശർമയാണ് പരാതി നല്‍കിയത്.
ശത്രുത വളർത്തല്‍, പൊതുജനങ്ങളെ കുഴപ്പത്തിലാക്കുന്ന പ്രസ്താവനകള്‍, അപകീർത്തിപ്പെടുത്തല്‍ എന്നീ വകുപ്പുകള്‍ ചുമത്തി കേസ് റജിസ്റ്റര്‍ ചെയ്തതായി ഷിംല പോലീസ് അറിയിച്ചു. സംഭവത്തില്‍ കൂടുതല്‍ അന്വേഷണം നടക്കുകയാണെന്നും പോലീസ് പറഞ്ഞു. കോണ്‍ഗ്രസ് നേതാവ് സോണിയ ഗാന്ധിയെ ”നിഗൂഢമായ വിദേശ പൗര” എന്ന് പരാമർശിക്കുന്ന പോസ്റ്റില്‍ അവരുടെ ബന്ധുക്കള്‍ ഒന്നിനു പുറകെ ഒന്നായി കൊല്ലപ്പെട്ടുവെന്നും പറയുന്നുണ്ട്.
കൂടാതെ ബന്ധുക്കള്‍ ഇത്തരത്തില്‍ കൊല്ലപ്പെട്ടത് സോണിയ, സർക്കാരിന്റെ തലവയാകാൻ വഴിയൊരുക്കിയെന്നും പോസ്റ്റില്‍ സൂചിപ്പിക്കുന്നു. ‘എത്ര സൗകര്യപ്രദം’ എന്ന പരാമർശത്തോടെയാണ് പോസ്റ്റ് അവസാനിച്ചത്. സഞ്ജയ് ഗാന്ധിയുടെ മരണശേഷം ഭാര്യ മേനക ഗാന്ധിയെ കുടുംബ വസതിയില്‍ നിന്ന് പുറത്താക്കി എന്ന കങ്കണയുടെ വാദവും പരാതിയില്‍ ഉന്നയിച്ചിട്ടുണ്ട്. രാഷ്ട്രീയ വിമർശനത്തിനപ്പുറം പ്രകോപനപരമായ വിവരണങ്ങള്‍ പ്രചരിപ്പിക്കാനുള്ള മനഃപൂർവമായ ശ്രമമാണ് ഇതിനെല്ലാം പിന്നിലെന്ന് ശർമ പറഞ്ഞു.
SUMMARY: Case filed against Kangana Ranaut over derogatory remarks against the Gandhi family
