കണ്ണൂരിൽ സിപിഐഎം പ്രവർത്തകന് കുത്തേറ്റു; പിന്നില്‍ കോണ്‍ഗ്രസ് എന്ന് ആരോപണം

കണ്ണൂർ: മയ്യിലില്‍ സിപിഐഎം പ്രവർത്തകന് കുത്തേറ്റു. അരിബ്ര സ്വദേശിയായ പി പി പ്രകാശനാണ് കുത്തേറ്റത്. വോട്ടെടുപ്പിന് ശേഷം ബൂത്തിലുണ്ടായ പ്രശ്നത്തിന് പിന്നാലെയുണ്ടായ തർക്കം തടുക്കാൻ ശ്രമിച്ചപ്പോഴാണ് പ്രകാശിന് കുത്തേറ്റത്. വയറിന്‍റെ ഇടതുഭാഗത്തായിട്ടാണ് കുത്തേറ്റത്.

കോൺ​ഗ്രസ് പ്രാദേശിക നേതാവാണ് ആക്രമണത്തിന് പിന്നിലെന്നാണ് സിപിഐഎമ്മിന്റെ ആരോപണം. ആക്രമണത്തിൽ ​ഗുരുതരമായി പരുക്കേറ്റ പ്രകാശനെ ആശുപത്രിയിൽ പ്രവേശിപ്പിച്ചിട്ടുണ്ട്. ലോക്കൽ സെക്രട്ടറിയുടെ സഹോദരനാണ് പരുക്കേറ്റ പി പി പ്രകാശൻ.

പരാജയഭീതിയിൽ കോണ്‍ഗ്രസ് അക്രമം അഴിച്ചുവിടുകയാണെന്ന് സിപിഐഎം സംസ്ഥാന സെക്രട്ടറി എം വി ​ഗോവിന്ദൻ പ്രതികരിച്ചു. ആർഎസ്എസുകാരെ പോലെയാണ് കോൺ​ഗ്രസുകാർ പെരുമാറുന്നത്. തർക്കമുണ്ടായപ്പോൾ പരിഹരിക്കാൻ പോയ വ്യക്തിയാണ് ആക്രമണത്തിനിരയായത്. ജനങ്ങളെ അണിനിരത്തി പ്രതിഷേധിക്കുമെന്നും എം വി ​ഗോവിന്ദൻ പറ‍ഞ്ഞു.