ദുബായ്: ദുബായ് വിമാനത്താവളത്തിന് നേരെ ഇറാന്റെ ഡ്രോൺ ആക്രമണം. വിമാനത്താവളത്തിന് സമീപം വൻ തീപ്പിടിത്തമുണ്ടായതായാണ് റിപ്പോർട്ട്. തീപിടിച്ചത് വിമാനത്താവളത്തിലെ എണ്ണടാങ്കിനാണ്. സിവിൽ ഡിഫൻസ് സംഘം സ്ഥലത്തെത്തി തീ നിയന്ത്രണവിധേയമാക്കാനുള്ള ശ്രമങ്ങൾ തുടരുകയാണ്. സംഭവത്തിൽ ഇതുവരെ ആളപായമോ പരുക്കുകളോ റിപ്പോർട്ട് ചെയ്തിട്ടില്ല. സുരക്ഷ ഉറപ്പാക്കാനുള്ള എല്ലാ നടപടികളും സ്വീകരിച്ചതായി അധികൃതർ പറയുന്നു. യുഎസും ഇസ്രയേലും ഇറാനിൽ ആക്രമണം നടത്തുമ്പോൾ ഗൾഫിലെ യുഎസ് താവളങ്ങളും യുഎസുമായി ബന്ധമുള്ള കേന്ദ്രങ്ങളും ലക്ഷ്യമിട്ട് ഇറാൻ ആക്രമണ ശ്രമങ്ങൾ നടത്തുകയാണ്.
കഴിഞ്ഞ ഒന്നരമണിക്കൂറിനിടെ രാജ്യത്തിന്റെ കിഴക്കൻ മേഖലയിൽ എത്തിയ 37 ഡ്രോണുകൾ തടഞ്ഞതായി സൗദി പ്രതിരോധ മന്ത്രാലയം അറിയിച്ചു. എന്നാൽ ഈ ഡ്രോണുകൾ എവിടെ നിന്നാണ് വിക്ഷേപിച്ചതെന്ന് മന്ത്രാലയം വ്യക്തമാക്കിയിട്ടില്ല.
സൗദിയുടെ കിഴക്കൻ തീരത്തെ റാസ് തന്നൂറ റിഫൈനറിക്ക് നേരെയുണ്ടായ ആക്രമണങ്ങൾക്കും യുഎഇ അതിർത്തിയോട് ചേർന്നുള്ള ഷൈബ എണ്ണപ്പാടത്തിന് നേരെ നടന്ന ഡ്രോൺ ആക്രമണ ശ്രമങ്ങൾക്കും പിന്നിൽ ഇറാനല്ലെന്ന് സൗദിയിലെ ഇറാൻ അംബാസഡർ അലിറെസ ഇനായത്തി പറഞ്ഞു.
SUMMARY: Drone attack: Huge fire near Dubai airport
