ബെള്ളാരി: ബിജെപിയിലേക്കു മടങ്ങുമെന്ന സൂചനയുമായി പാർട്ടി പുറത്താക്കിയ മുൻ ഉപമുഖ്യമന്ത്രി കെ.എസ്. ഈശ്വരപ്പ. ഇതു സംബന്ധിച്ച ചർച്ചകൾ ബിജെപിയിൽ നടക്കുന്നതായി ഈശ്വരപ്പ വെളിപ്പെടുത്തി. നേരത്തേ ലോക്സഭാ തിരഞ്ഞെടുപ്പിൽ മകന് സീറ്റ് നിഷേധിച്ചതിൽ പ്രതിഷേധിച്ച് ഈശ്വരപ്പ സ്വതന്ത്രനായി മത്സരിച്ചിരുന്നു. ഇതോടെയാണ് 6 വർഷത്തേക്ക് ബിജെപി പുറത്താക്കിയത്.
കോൺഗ്രസ് നേതാക്കൾ തനിക്കും മകനും ഉയർന്ന സ്ഥാനങ്ങൾ വാഗ്ദാനം ചെയ്ത് പാർട്ടിയിലേക്കു ക്ഷണിച്ചതായി ഈശ്വരപ്പ അവകാശപ്പെട്ടു. സമാജ് വാദി പാർട്ടി നേതാവ് അഖിലേഷ് യാദവും ഒപ്പം ചേരാൻ ക്ഷണിച്ചു, എന്നാൽ മരണം വരെ ഹിന്ദുത്വ ആശയങ്ങളിൽ നിന്നു പിന്നോട്ടില്ലെന്നും ബിജെപി വിടില്ലെന്നും അദ്ദേഹം പറഞ്ഞു. ഒട്ടേറെ തവണ മന്ത്രിയായിട്ടുള്ള ഈശ്വരപ്പ ബിജെപി സംസ്ഥാന പ്രസിഡന്റ്, നിയമ നിർമാണ കൗൺസിലിലെ പ്രതിപക്ഷ നേതാവ് എന്നീ സ്ഥാനങ്ങളും വഹിച്ചിട്ടുണ്ട്.
SUMMARY: Eshwarappa says talks are ongoing within BJP on bringing him back to the party.
