തിരുവനന്തപുരം: കെഎസ്ആര്ടിസി ബസ്സുകളില് സ്ത്രീകള്ക്ക് സൗജന്യ യാത്ര അനുവദിക്കുന്ന പദ്ധതി ആദ്യഘട്ടത്തില് ഓര്ഡിനറി ബസ്സുകളില് മാത്രം നടപ്പാക്കാന് തീരുമാനം. മുഖ്യമന്ത്രി വി ഡി സതീശനും ഗതാഗതമന്ത്രി സി പി ജോണും തമ്മിലുള്ള കൂടിക്കാഴ്ചയിലാണ് ഇതുസംബന്ധിച്ച തീരുമാനമായത്. ജൂണ് 15 മുതല് സ്ത്രീകള്ക്ക് സൗജന്യ യാത്ര ഉറപ്പാക്കുമെന്ന് സര്ക്കാര് നേരത്തെ പ്രഖ്യാപിച്ചിരുന്നു.
ഇതിന്റെ നടപ്പാക്കല് സംബന്ധിച്ച വിശദാംശങ്ങള് ചര്ച്ച ചെയ്യുന്നതിനായി ഗതാഗതമന്ത്രിയും മുഖ്യമന്ത്രിയും സെക്രട്ടേറിയറ്റില് ഇന്ന് കൂടിക്കാഴ്ച നടത്തി. ആദ്യ 100 ദിവസത്തേക്ക് പദ്ധതി ഓര്ഡിനറി സര്വീസുകളില് മാത്രമായി നടപ്പാക്കാനാണ് തീരുമാനം. ഈ കാലയളവിലെ വരുമാനചെലവ് കണക്കുകള് പഠിച്ച് റിപോര്ട്ട് സമര്പ്പിക്കാന് ഗതാഗത കമ്മീഷണറോട് നിര്ദേശിക്കുമെന്നാണ് വിവരം. ഓര്ഡിനറി ബസ്സുകള് ഇല്ലാത്ത മണ്ഡലങ്ങളില് ആവശ്യമായ സര്വീസുകള് ഏര്പ്പെടുത്താനും പരിഗണനയിലുണ്ട്.
സ്ത്രീകള്ക്ക് പ്രായപരിധിയോ മറ്റു മാനദണ്ഡങ്ങളോ ഇല്ലാതെ സൗജന്യ യാത്ര അനുവദിക്കാനാണ് നിലവിലെ തീരുമാനം. യാത്രാ ഇളവിന്റെ സാമ്പത്തിക ബാധ്യത സര്ക്കാര് നേരിട്ട് വഹിക്കുമെന്നതിനാല് കെഎസ്ആര്ടിസിക്ക് അധിക സാമ്പത്തിക ഭാരം ഉണ്ടാകില്ലെന്നാണ് വിലയിരുത്തല്. അതേസമയം, പദ്ധതിയെക്കുറിച്ച് കെഎസ്ആര്ടിസിയിലെ വിവിധ തൊഴിലാളി സംഘടനകള് ആശങ്ക പ്രകടിപ്പിച്ചിട്ടുണ്ട്.
പദ്ധതിമൂലം ഉണ്ടാകുന്ന സാമ്പത്തിക ബാധ്യത പൂര്ണമായും സര്ക്കാര് ഏറ്റെടുക്കണമെന്ന് യൂണിയനുകള് ആവശ്യപ്പെട്ടു. കെഎസ്ആര്ടിസിയുടെ സാമ്പത്തിക സ്ഥിരത ഉറപ്പാക്കുന്ന നടപടികള്ക്കും സര്ക്കാര് മുന്ഗണന നല്കണമെന്നാണ് അവരുടെ നിലപാട്.
SUMMARY: Free travel for women in KSRTC; First 100 days only in ordinary buses
