ബെംഗളൂരു: ഗോവ – മംഗളൂരു- യശ്വന്ത്പുർ വന്ദേഭാരത് എക്സ്പ്രസിന്‍റെ സർവീസ് 13 മുതൽ ആരംഭിക്കും. ആഴ്ചയിൽ ആറുദിവസം ഇരുദിശകളിലേക്കും ട്രെയിൻ സർവീസ് നടത്തുക. പ്രധാനമന്ത്രി നരേന്ദ്ര മോദി ബെംഗളൂരുവിൽ നിന്നും റെയിൽവേ മന്ത്രി അശ്വിനി വൈഷ്ണവ് മംഗളൂരു ജങ്ഷനിൽ നിന്നും ട്രെയിൻ ഫ്ലാഗ് ഓഫ് ചെയ്യുമെന്നാണ് റിപ്പോർട്ടുകൾ സൂചിപ്പിക്കുന്നത്.
ബെംഗളൂരുവിൽനിന്ന് ബുധനാഴ്ചയും ഗോവയിൽനിന്ന് വ്യാഴാഴ്ചയും സർവീസ് ഉണ്ടാകില്ല. രാവിലെ 7.35ന് ട്രെയിൻ യശ്വന്ത്പൂരിൽനിന്ന് പുറപ്പെടും. രാത്രി 8.55ന് ഗോവയിലെത്തും. മഡ്ഗാവില്‍ നിന്ന് രാവിലെ 08:20-ന് പുറപ്പെട്ട് ഉച്ചയ്ക്ക് 01:50-ന് മംഗളൂരു ജങ്ഷനിലും, രാത്രി 09:15-ന് യശ്വന്ത്പൂരിലും എത്തും. (യാത്രാ സമയം: 12 മണിക്കൂർ 55 മിനിറ്റ്).
ശ്രാവണബെലഗോള, ഹാസൻ സക്ലേഷ് പുര, സുബ്രഹ്മണ്യ റോഡ്, കബക്കാപുത്തൂർ, മംഗളൂരു ജംഗ്ഷൻ, തൊക്കൂർ, ഉഡുപ്പി കുന്താപ്പുര, മൂകാംബിക റോഡ് ബൈന്ദൂർ, മുരുഡേശ്വർ ഗോകർണ റോഡ്, കാർവാർ എന്നിവിടങ്ങളിൽ സ്റ്റോപ്പുകളുണ്ട്.
നിലവിലുണ്ടായിരുന്ന മംഗളൂരു സെൻട്രൽ – മഡ്ഗാവ് വന്ദേ ഭാരത് എക്സ്പ്രസ് (20645/20646) ഈ പുതിയ സർവീസ് വരുന്നതോടെ നിർത്തലാക്കും. അതിന് പകരമായാണ് ഈ റൂട്ട് ബെംഗളൂരുവിലേക്ക് നീട്ടി പുതിയ സർവീസാക്കി മാറ്റുന്നത്. പശ്ചിമഘട്ടത്തിലെ സിംഗിൾ ട്രാക്ക് പാതയിലൂടെ കടന്നുപോകുന്നതിനാൽ ഇന്ത്യയിലെ ഏറ്റവും യാത്രാസമയമുള്ള വന്ദേ ഭാരത് ചെയർകാർ സർവീസുകളിൽ ഒന്നായിരിക്കും ഇത്.
മണിക്കൂറിൽ 54 കിലോമീറ്റർ മാത്രമാകും ട്രെയിനിന്‍റെ വേഗത. രാജ്യത്തെ വന്ദേഭാരത് സർവീസുകളിൽ വേഗം കുറഞ്ഞ സർവീസാകും ഇത്. ഗോവ – മംഗളൂരൂ വന്ദേഭാരത് കോഴിക്കോട്ടേക്ക് നീട്ടണമെന്ന് നേരത്തേ ആവശ്യമുയർന്നിരുന്നു. എന്നാൽ ഇത് പരിഗണിക്കാതെയാണ് മംഗളൂരുവിൽനിന്ന് ബെംഗളൂരുവിലേക്ക് സർവീസ് നീട്ടിയത്.
SUMMARY: Goa–Mangaluru–Yesvantpur service to commence on the 13th; it will be the slowest among the Vande Bharat services in the country.
