ബെംഗളൂരു: ബസ് നിര്ത്താന് ആവശ്യപ്പെട്ടത് നിരസിച്ചതിനെ തുടര്ന്ന് ബിഎംടിസി ഡ്രൈവറെ ചെരിപ്പുകൊണ്ട് ആക്രമിച്ച വനിത ഐടി ജീവനക്കാരിയെ പോലീസ് അറസ്റ്റ് ചെയ്തു. ബിഎംടിസിയുടെ ചിക്കനാഗമംഗല ഡിപ്പോയിലെ ഡ്രൈവര് അത്തര് ഹുസൈനാണ് മര്ദ്ദനമേറ്റത്. കാവ്യ എന്ന യുവതിയാണ് അറസ്റ്റിലായത്.
ജൂണ് 11ന് രാവിലെ ആയിരുന്നു സംഭവം. ടിന് ഫാക്ടറിയില് നിന്നും വിപ്രോഗേറ്റ്- ഇലക്ട്രോണിക് സിറ്റിയിലേക്ക് പോവുകയായിരുന്നു ബസ്. 8:30 ഓടെ ബസ് കൈഗൊണ്ടനഹള്ളിയില് എത്തിയപ്പോള് സ്റ്റോപ്പിലാത്ത സ്ഥലത്ത് യുവതി ബസ് നിര്ത്താന് ആവശ്യപ്പെടുകയായിരുന്നു. റോഡില് വാഹനതിരക്കേറെയാണെന്നും വഴിയില് നിര്ത്തുന്നത് ട്രാഫിക് നിയമ ലംഘനമാണെന്നും അതുകൊണ്ട് ബസ് നിര്ത്താന് കഴിയില്ലെന്നും നിശ്ചിത സ്റ്റോപ്പുകളില് മാത്രമേ ബസ് നിര്ത്തുകയുള്ളൂവെന്നും ഹുസൈന് അവരെ അറിയിച്ചു. ഇതില് പ്രകോപിതയായ യുവതി ഡ്രൈവറെ അസഭ്യം പറയുകയും തന്റെ ചെരിപ്പൂരി അടിക്കുകയുമായിരുന്നു. യുവതി ആക്രമിച്ചതോടെ ഡ്രൈവര് ബസ് നിര്ത്തി. ഇതിനിടയില് യുവതി ബസില് നിന്നും ചാടി രക്ഷപ്പെടാന് ശ്രമിച്ചെങ്കിലും യാത്രക്കാര് ചേര്ന്ന് പിടികൂടി പോലീസിന് കൈമാറുകയായിരുന്നു. ഹുസൈന്റെ പരാതിയുടെ അടിസ്ഥാനത്തില് യുവതിക്കെതിരെ ബിഎൻഎസ് സെക്ഷൻ 121, 131, 132, 352 എന്നീ വകുപ്പുകൾ പ്രകാരം ബെല്ലന്ദൂർ പോലീസ് കേസെടുത്തു. കോടതിയില് ഹാജരാക്കിയ ശേഷം യുവതിയെ പിന്നീട് ജാമ്യത്തില് വിട്ടു.
SUMMARY: IT employee arrested for beating driver with shoe for refusing to stop bus at non-stop location
