ബെംഗളൂരു: കർണാടകയിലെ ബെളഗാവി ജില്ലയിൽ കെ.എസ്.ആർ.ടി.സി. ബസും ടിപ്പർ ലോറിയും കൂട്ടിയിടിച്ചുണ്ടായ അപകടത്തിൽ ബസ് ഡ്രൈവർ മരിച്ചു. 12 യാത്രക്കാർക്ക് പരുക്കേറ്റു. വെള്ളിയാഴ്ച ദേശീയപാത 48-ൽ ഹുക്കേരി താലൂക്കിലെ സങ്കേശ്വറിന് സമീപമാണ് അപകടമുണ്ടായത്.ബസ് ഡ്രൈവറുടെ പേര് സംഗപ്പ തൽവാർ എന്നാണ് .ഗദഗ് ജില്ലയിലെ റോൺ താലൂക്കിലെ സവഡി നിവാസിയാണ്.
ഗംഗാവതിയിൽനിന്ന് ബെളഗാവി വഴി മഹാരാഷ്ട്രയിലെ കോലാപുരിലേക്ക് സർവീസ് നടത്തുകയായിരുന്ന സംസ്ഥാന റോഡ് ഗതാഗത കോർപ്പറേഷന്റെ ബസാണ് അപകടത്തിൽപ്പെട്ടത്. മുന്നിലുണ്ടായിരുന്ന ടിപ്പർ ലോറിയുടെ പിൻഭാഗത്ത് ബസ് ഇടിക്കുകയായിരുന്നുവെന്നാണ് പ്രാഥമിക റിപ്പോർട്ടുകൾ. ഇടിയുടെ ആഘാതത്തിലാണ് ബസ് ഡ്രൈവർ മരിച്ചത് .
അപകടവിവരമറിഞ്ഞ് സ്ഥലത്തെത്തിയ രക്ഷാപ്രവർത്തകർ പരിക്കേറ്റ 12 യാത്രക്കാരെയും സങ്കേശ്വർ താലൂക്ക് ആശുപത്രിയിലേക്ക് മാറ്റി. ഇവരുടെ പരിക്കുകളുടെ തീവ്രതയെക്കുറിച്ചുള്ള വിശദമായ വിവരങ്ങൾ പ്രാഥമിക റിപ്പോർട്ടുകളിൽ ലഭ്യമായിട്ടില്ല. അപകടത്തിന്റെ കൃത്യമായ കാരണം വ്യക്തമല്ല. സംഭവത്തിൽ പോലീസ് അന്വേഷണം തുടരുകയാണ്.
SUMMARY: KSRTC bus and tipper lorry collide; driver dies, 12 injured.
