പാലക്കാട്: നെന്മാറ പോത്തുണ്ടിയില് കെഎസ്ആർടിസി ബസ് മറിഞ്ഞുണ്ടായ അപകടത്തില് ഒരുമരണം. നിരവധിപേർക്ക് പരുക്കേറ്റു. ഇന്ന് രാവിലെ 10 മണിയോടെ നെല്ലിയാമ്പതിയില് നിന്ന് പോത്തുണ്ടിയിലേയ്ക്ക് വരികയായിരുന്ന ബസാണ് അപകടത്തില്പ്പെട്ടത്. കനത്ത മഴയെ തുടർന്ന് റോഡിലുണ്ടായ വഴുക്കലാകാം അപകടത്തിന് കാരണമെന്നാണ് പ്രാഥമിക നിഗമനം.
നെല്ലിയാമ്പതിയില് നിന്ന് ചുരമിറങ്ങി നെന്മാറ ഭാഗത്തേയ്ക്ക് വരികയായിരുന്ന ബസ് പോത്തുണ്ടി ചെക്ക്പോസ്റ്റ് കഴിഞ്ഞ് രണ്ടാമത്തെ വളവില്നിന്ന് താഴ്ചയിലേയ്ക്ക് മറിയുകയായിരുന്നു. ബസ് മരത്തിനിടയില് കുടുങ്ങിക്കിടക്കുകയാണ്. ബസിനും മരത്തിനുമിടയില് ഒരു സ്ത്രീ കുടുങ്ങിക്കിടന്നിരുന്നു. ഇവരാണ് മരിച്ചതെന്നാണ് വിവരം.
അപകടത്തില് പരുക്കേറ്റവരെ നെന്മാറ ആശുപത്രിയില് പ്രവേശിപ്പിച്ചു. ഇതില് ചിലരുടെ നില ഗുരുതരമാണെന്നാണ് റിപ്പോർട്ട്. നെല്ലിയാമ്പതി സ്വദേശികളാണ് ബസില് കൂടുതലുണ്ടായിരുന്നതെന്നാണ് വിവരം. കനത്ത മഴയും അപകടവും കാരണം പ്രദേശത്ത് ഗതാഗതം തടസപ്പെട്ടു. സ്ഥലത്ത് നാട്ടുകാരുടെയും ഫയർഫോഴ്സിന്റെയും നേതൃത്വത്തില് രക്ഷാപ്രവർത്തനം തുടരുകയാണ്.
SUMMARY: KSRTC bus overturns into a gorge in Palakkad; woman dies after being thrown out of the bus
