ബെംഗളൂരു: കഴിഞ്ഞ ഒരാഴ്ചയായി കർണാടകയുടെ മലയോര-തീരദേശ മേഖലകളിൽ ലഭിച്ച ശക്തമായ മഴ സംസ്ഥാനത്തിന് വലിയ ആശ്വാസമായി. മഴ ശക്തമായതോടെ കാവേരി നദീതടത്തിലെ കൃഷ്ണരാജസാഗർ , കബിനി, ഹാരംഗി, ഹേമാവതി ഉൾപ്പെടെയുള്ള പ്രധാന അണക്കെട്ടുകളിലേക്കുള്ള നീരൊഴുക്ക് ഗണ്യമായി വർധിച്ചു. ഇതോടെ ജലസംഭരണികളുടെ ജലനിരപ്പ് മെച്ചപ്പെടുകയും, കഴിഞ്ഞ മാസങ്ങളിൽ നിലനിന്നിരുന്ന ജലക്ഷാമ ആശങ്കയ്ക്ക് താൽക്കാലിക ആശ്വാസമാകുകയും ചെയ്തു. അണക്കെട്ടുകൾ നിറഞ്ഞത് ആശ്വാസകരമാണെന്ന് കർണാടക മുഖ്യമന്ത്രി ഡി.കെ. ശിവകുമാർ പ്രതികരിച്ചു. മൈസൂരു, മാണ്ഡ്യ, ബെംഗളൂരു എന്നിവിടങ്ങളിലെയും തമിഴ്നാട്, പുതുച്ചേരി എന്നിവിടങ്ങളിലെയും ജനങ്ങൾക്ക് ഈ മഴ ആശ്വാസമാകുമെന്നും അദ്ദേഹം കൂട്ടിച്ചേർത്തു.
വയനാട്ടിലെ വൃഷ്ടിപ്രദേശങ്ങളിൽ പെയ്ത കനത്ത മഴയെത്തുടർന്ന് മൈസൂരുവിലെ കബനി അണക്കെട്ടിലെ ജലനിരപ്പ് പരമാവധി ശേഷിയായ 2,284 അടിക്ക് തൊട്ടടുത്തെത്തി (2,281.43 അടി). കുടക് ജില്ലയിലെ ഹാരംഗി അണക്കെട്ടിലും ജലനിരപ്പ് പരമാവധി ശേഷിയോടടുത്തു. മാണ്ഡ്യയിലെ കെആർഎസ് അണക്കെട്ടിലേക്കുള്ള നീരൊഴുക്കും കുത്തനെ വർധിച്ചിട്ടുണ്ട്.
മാണ്ഡ്യ, മൈസൂരു, ഹാസൻ, കുടക് ജില്ലകളിലെ കർഷകർക്ക് ഈ മഴ ഏറെ പ്രതീക്ഷയാണ് നൽകുന്നത്. നെൽകൃഷി ഉൾപ്പെടെയുള്ള ഖരീഫ് കൃഷികൾക്ക് ആവശ്യമായ ജലസേചനത്തിനുള്ള വെള്ളം ലഭ്യമാകുമെന്ന പ്രതീക്ഷയിലാണ് കർഷകർ. മഴ ലഭിച്ചതോടെ പല പ്രദേശങ്ങളിലും കൃഷിയിടങ്ങളിലെ ജലലഭ്യത മെച്ചപ്പെട്ടതായും കാർഷിക വിദഗ്ധർ പറയുന്നു.
അതേസമയം, കാവേരി ജലവിഷയത്തിൽ കർണാടകയും തമിഴ്നാടും തമ്മിലുള്ള തർക്കം തുടരുന്ന സാഹചര്യത്തിൽ അണക്കെട്ടുകളിലെ ജലനിരപ്പ് ഉയരുന്നത് സംസ്ഥാന സർക്കാരിനും ആശ്വാസമാണ്. എങ്കിലും, കർഷകരുടെ ആവശ്യങ്ങളും ബെംഗളൂരു ഉൾപ്പെടെയുള്ള നഗരങ്ങളിലെ കുടിവെള്ള ആവശ്യങ്ങളും മുൻനിർത്തി ജലം സൂക്ഷ്മമായി വിനിയോഗിക്കണമെന്നാണ് ജലവിഭവ വകുപ്പ് നിർദേശിക്കുന്നത്.
മറുവശത്ത്, മഴ ശക്തമായതോടെ ദക്ഷിണ കന്നഡ, ഉഡുപ്പി, ശിവമൊഗ്ഗ, ചിക്കമഗളൂരു, കുടക് ജില്ലകളിൽ മണ്ണിടിച്ചിലും വെള്ളക്കെട്ടും നദികളിലെ ജലനിരപ്പ് ഉയരുന്നതും റിപ്പോർട്ട് ചെയ്തിട്ടുണ്ട്. ചില പ്രദേശങ്ങളിൽ റോഡ് ഗതാഗതവും റെയിൽ സർവീസുകളും മഴയെ തുടർന്ന് ബാധിച്ചു. ദുരന്തസാധ്യതയുള്ള മേഖലകളിൽ ജില്ലാ ഭരണകൂടം ജാഗ്രതാ നിർദേശം തുടരുകയാണ്.
കാലാവസ്ഥാ വകുപ്പ് അടുത്ത ദിവസങ്ങളിലും സംസ്ഥാനത്തിന്റെ മലയോര, തീരദേശ മേഖലകളിൽ ശക്തമായ മഴ തുടരുമെന്ന് പ്രവചിച്ചിട്ടുണ്ട്. മഴ കാർഷിക മേഖലയ്ക്ക് ഗുണകരമാണെങ്കിലും, പ്രളയ-മണ്ണിടിച്ചിൽ സാധ്യതയുള്ള പ്രദേശങ്ങളിൽ താമസിക്കുന്നവർ ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകി. മഴയും അണക്കെട്ടുകളിലേക്കുള്ള നീരൊഴുക്കും തുടർന്നാൽ സംസ്ഥാനത്തെ ജലസംഭരണ നില കൂടുതൽ മെച്ചപ്പെടുമെന്നും, ഇത് കർഷകർക്കും കുടിവെള്ള വിതരണത്തിനും ഗുണകരമാകുമെന്നുമാണ് വിലയിരുത്തൽ.
SUMMARY: Relief for Karnataka; Heavy rains in Cauvery basin, water flow into dams increases
