തിരുവനന്തപുരം: റിപ്പബ്ലിക് ദിനാഘോഷങ്ങളുടെ പശ്ചാത്തലത്തില് രാജ്യത്ത് ട്രെയിൻ അട്ടിമറി നീക്കങ്ങള് ഉണ്ടായേക്കാമെന്ന് കേന്ദ്ര രഹസ്യാന്വേഷണ വിഭാഗം മുന്നറിയിപ്പ് നല്കി. ഇതേത്തുടർന്ന് കേരളത്തിലടക്കം റെയില്വേ മേഖലയില് അതീവ ജാഗ്രത പ്രഖ്യാപിച്ചു. റെയില് ഗതാഗതത്തിന് നേരെ അട്ടിമറി ഉണ്ടായേക്കാമെന്നാണ് മുന്നറിയിപ്പ്.
ട്രെയിനുകളുടെ സുരക്ഷ ഉറപ്പാക്കുന്നതിനായി റെയില്വേ പ്രൊട്ടക്ഷൻ ഫോഴ്സ് (ആർപിഎഫ്) ഉദ്യോഗസ്ഥർക്ക് റെയില്വേ ബോർഡ് കർശന നിർദേശം നല്കിയിട്ടുണ്ട്. റെയില്വേ ട്രാക്കുകള്ക്ക് സമീപം നിർമാണ വസ്തുക്കളോ മറ്റ് സാധനങ്ങളോ അലക്ഷ്യമായി ഉപേക്ഷിക്കരുതെന്നും അത്തരം വസ്തുക്കള് സുരക്ഷിതമായ സ്ഥലങ്ങളിലേക്ക് മാറ്റണമെന്നും അധികൃതർ അറിയിച്ചു.
പാളങ്ങളിലോ പരിസരത്തോ സംശയാസ്പദമായ രീതിയില് എന്തെങ്കിലും ശ്രദ്ധയില്പ്പെട്ടാല് വൈകാതെ തന്നെ വിവരം അറിയിക്കണമെന്ന് ഉദ്യോഗസ്ഥരോടും യാത്രക്കാരോടും നിർദേശിച്ചിട്ടുണ്ട്. പ്രധാന സ്റ്റേഷനുകളില് പരിശോധന കർശനമാക്കാനും നിരീക്ഷണം ശക്തമാക്കാനും പ്രത്യേക സർക്കുലർ പുറപ്പെടുവിച്ചു.
അനിഷ്ട സംഭവങ്ങള് ഒഴിവാക്കി സുരക്ഷിതമായ യാത്ര ഉറപ്പാക്കാൻ എല്ലാ ജീവനക്കാരും അതീവ ജാഗ്രത പാലിക്കണമെന്നും സുരക്ഷാ വിഭാഗം അറിയിച്ചു. റിപ്പബ്ലിക് ദിന ആഘോഷങ്ങളോടനുബന്ധിച്ച് രാജ്യത്ത് സുരക്ഷ ശക്തമാക്കിയിരിക്കുകയാണ്. ഡല്ഹിയിലും ചെങ്കോട്ടയിലും പരിസര പ്രദേശങ്ങളിലും സുരക്ഷ വർധിപ്പിച്ചു.
SUMMARY: RPF warns of possible train sabotage, report says
WhatsApp
Telegram
