ഡൽഹി: മലയാളികളുടെ ഹൃദയങ്ങളില് ഇടം നേടിയ ഗായകൻ നരേഷ് അയ്യർ വിവാഹിതനായി. മഹാരാഷ്ട്രയിലെ പവായിലുള്ള അയ്യപ്പ വിഷ്ണു ക്ഷേത്രത്തിന്റെ സോഷ്യല് മീഡിയ പോസ്റ്റിലൂടെയാണ് വിവാഹവാർത്ത പുറത്തുവന്നത്. നരേഷ് അയ്യരുടെ വിവാഹത്തിന് ആശംസകള് നേർന്നുകൊണ്ടുള്ള ക്ഷേത്രത്തിന്റെ ഇൻസ്റ്റഗ്രാം കുറിപ്പാണ് ഇപ്പോള് സംഗീതപ്രേമികള്ക്കിടയില് ശ്രദ്ധ നേടുന്നത്.
ക്ഷേത്രത്തില് വെച്ചാണ് അദ്ദേഹത്തിന്റെ ജീവിതത്തിലെ പുതിയ അധ്യായത്തിന് തുടക്കമായതെന്നും കുറിപ്പില് വ്യക്തമാക്കുന്നു. എന്നാല് വിവാഹച്ചടങ്ങുമായി ബന്ധപ്പെട്ട കൂടുതല് വിവരങ്ങള്, വധുവിനെക്കുറിച്ചുള്ള വിവരങ്ങള് തുടങ്ങിയവ ഇതുവരെ പുറത്തുവന്നിട്ടില്ല.
2006 ല് പുറത്തിറങ്ങിയ ഹിന്ദി ചലച്ചിത്രമായ ‘രംഗ് ദേ ബസന്തി’യിലെ ‘രൂബരൂ…’ എന്ന ഗാനത്തിന് ഏറ്റവും നല്ല പിന്നണിഗായകനുള്ള ദേശീയ പുരസ്കാരവും പുതുമുഖ ഗായകനുള്ള ആർ.ഡി. ബർമ്മൻ ഫിലിംഫെയർ പുരസ്കാരവും നരേഷ് നേടിയിട്ടുണ്ട്.
പൃഥ്വിരാജും മംമ്ത മോഹൻദാസും പ്രധാന വേഷത്തിലെത്തിയ ‘അൻവറി’ലെ ‘കണ്ണിനിമ നീളെ…’ എന്ന ഒരു പാട്ടു മതി മലയാളികള്ക്ക് നരേഷിനെ ഓർക്കാൻ. “മേല് മേല്…” (ഉസ്താദ് ഹോട്ടല്), “സ്വപ്നം…” (സെക്കൻണ്ട് ഷോ), “നിനവേ… നിനവേ…” (ടീൻസ്), “മഞ്ഞില് മുങ്ങിപ്പൊങ്ങും…” (പ്രണയകഥ), എന്നിവയാണ് മലയാളത്തിലുള്ള നരേഷിന്റെ ശ്രദ്ധേയമായ പാട്ടുകള്.
SUMMARY: Singer Naresh Iyer gets married
