തിരുവനന്തപുരം: കെ.എസ്.ആർ.ടി.സി ബസുകളില്‍ വിദ്യാർഥികളുടെ യാത്രാ പാസ്സ് പുതുക്കാനുള്ള ഓണ്‍ലൈൻ നിരക്ക് 10 രൂപയില്‍ നിന്ന് ഒറ്റയടിക്ക് 110 രൂപയാക്കി ഉയർത്തിയ നടപടിക്കെതിരെ കടുത്ത പ്രതിഷേധവുമായി എസ്.എഫ്.ഐ രംഗത്ത്. ഈ നടപടി വിദ്യാർഥികളോടുള്ള വഞ്ചനയാണെന്നും ഇത് കേരളത്തിലെ സാധാരണക്കാരായ വിദ്യാർഥികളോടുള്ള നീതികേടാണ് എന്നും എസ്.എഫ്.ഐ ആരോപിച്ചു.
ലക്ഷക്കണക്കിന് വിദ്യാർഥികളാണ് കേരളത്തില്‍ സ്കൂളുകളില്‍ പോകുവാനായി പൊതുഗതാഗത സംവിധാനം ഉപയോഗിച്ച്‌ പോരുന്നത്. എന്നാല്‍ വിദ്യാർഥി പാസ്സിനുള്ള ചാർജ് കുത്തനെ വർധിപ്പിച്ചത് അവരുടെ വിദ്യാഭ്യാസ അവകാശത്തെ റദ്ദ് ചെയ്യുന്ന നടപടിയാണ്. തീരുമാനം അടിയന്തിരമായി പിൻവലിക്കണമെന്നും അല്ലാത്തപക്ഷം യാത്രാവകാശ പോരാട്ടത്തില്‍ വിദ്യാർഥികളെ അണിനിരത്തി പ്രതിഷേധം തീർക്കുമെന്നും എസ് എഫ് ഐ സംസ്ഥാന പ്രസിഡന്റ്‌ എം ശിവപ്രസാദ് സെക്രട്ടറി പി എസ് സഞ്ജീവ് എന്നിവർ പ്രസ്താവനയിലൂടെ അറിയിച്ചു.
SUMMARY: Student pass renewal fee increased from Rs 10 to Rs 110; SFI strongly criticizes KSRTC
