താമരശേരിയില്‍ പതിമൂന്നുകാരിയെ കാണാതായ സംഭവത്തില്‍ ബന്ധുവായ യുവാവ് അറസ്റ്റില്‍. പെണ്‍കുട്ടിയേയും യുവാവിനെയും ഇന്നലെ ബെംഗളൂരുവില്‍ നിന്നാണ് കണ്ടെത്തിയത്. പെണ്‍കുട്ടിയുടെ മൊഴിയുടെ അടിസ്ഥാനത്തില്‍ യുവാവിനെതിരെ പോക്‌സോ അടക്കമുള്ള വകുപ്പുകള്‍ ചുമത്തിയാണ് കേസെടുത്തിരിക്കുന്നത്.
13കാരിയെ കർണാടക പോലീസാണ് കണ്ടെത്തിയത്. വിവരം ലഭിച്ചതിന്റെ അടിസ്ഥാനത്തില്‍ താമരശേരി പോലീസ് ബെംഗളൂരുവിലെത്തി. ഇന്നലെ രാത്രിയോടെ പെണ്‍കുട്ടിയെയും യുവാവിനെയും നാട്ടിലെത്തിച്ചു. മാർച്ച്‌ 11ന് രാവിലെ പരീക്ഷയ്ക്കായി സ്‌കൂളിലേക്ക് പോയതായിരുന്നു എട്ടാം ക്ലാസുകാരി. കാണാതായതോടെ രക്ഷിതാക്കള്‍ താമരശ്ശേരി പോലീസില്‍ പരാതി നല്‍കി.
പോലീസ് അന്വേഷണത്തില്‍ തൃശൂരിലെ സ്വകാര്യ ലോഡ്ജില്‍ നിന്നും യുവാവിന്റെയും പെണ്‍കുട്ടിയുടെയും സി സി ടി വി ദൃശ്യങ്ങള്‍ ലഭിച്ചിരുന്നു. അന്വേഷണം മറ്റു സംസ്ഥാനങ്ങളിലേക്കും വ്യാപിച്ചതിനു പിന്നാലെയാണ് ബെംഗളൂരുവില്‍ വച്ച്‌ കർണാടക പോലീസ് ഇവരെ കണ്ടെത്തിയത്.
TAGS : MISSING CASE
SUMMARY : Thirteen-year-old girl missing; youth arrested
