മോചനദ്രവ്യത്തിനായി അഞ്ച് വയസുകാരിയെ തട്ടിക്കൊണ്ടുപോയി; യുവാവ് പിടിയിൽ

ബെംഗളൂരു: മോചനദ്രവ്യത്തിനായി അഞ്ച് വയസുകാരിയെ തട്ടിക്കൊണ്ടുപോയ യുവാവ് പിടിയിൽ. രാമനഗരയിലാണ് സംഭവം. 22 കാരനായ ദർശൻ ആണ് അറസ്റ്റിലായത്. മയക്കുമരുന്ന് ഉപയോഗത്തിനായി പണം കണ്ടെത്താനാണ് ഇയാൾ പെൺകുട്ടിയെ തട്ടിക്കൊണ്ടുപോയതെന്ന് പോലീസ് പറഞ്ഞു.

പ്രദേശവാസിയായ സന്തോഷിൻ്റെ മകളെ കഴിഞ്ഞ ദിവസം രാത്രി എട്ടുമണിയോടെയാണ് കാണാതായത്. കുട്ടിയെ കാണാനില്ലെന്ന് മനസ്സിലാക്കിയ സന്തോഷ് നാട്ടുകാരുടെ സഹായത്തോടെ ഉടൻ തന്നെ തിരച്ചിൽ ആരംഭിച്ചു. തിരച്ചിലിനൊടുവിൽ വീടിനു സമീപത്തെ സിമന്റ് ഗോഡൗണിൽ വായും കൈകളും ടേപ്പ് ഉപയോഗിച്ച് കുരുക്കിയ നിലയിൽ പെൺകുട്ടിയെ ഇവർ കണ്ടെത്തി. ഇവിടെ നിന്നും രക്ഷപ്പെടാൻ ശ്രമിച്ച ദർശനെ നാട്ടുകാർ പിടികൂടി പോലീസിൽ ഏൽപ്പിക്കുകയായിരുന്നു.

മോചനദ്രവ്യം ആവശ്യപ്പെട്ട് രക്ഷിതാക്കളെ വിളിക്കാനായിരുന്നു ദർശന്റെ പദ്ധതി. മയക്കുമരുന്നിന് അടിമയായ ദർശൻ സമാന കുറ്റകൃത്യം മുമ്പും ചെയ്തിട്ടുണ്ട്. ഈ കേസുകളിൽ ജാമ്യത്തിൽ പുറത്തിറങ്ങിയ ശേഷമാണ് കുട്ടിയെ തട്ടിക്കൊണ്ടുപോയതെന്ന് ജില്ലാ പോലീസ് സൂപ്രണ്ട് കാർത്തിക് റെഡ്ഡി പറഞ്ഞു.

TAGS: MISSING | KIDNAPPING
SUMMARY: Man arrested for abducting five year old girl