ന്യൂഡൽഹി: മഹാരാഷ്ട്രയിലും ജാർഖണ്ഡിലും നടന്ന നിയമസഭാ തിരഞ്ഞെടുപ്പുകളിൽ ബിജെപിയും കോൺഗ്രസും പരസ്പരം നൽകിയ പരാതികളിൽ വിശദീകരണം ആവശ്യപ്പെട്ട് തിരഞ്ഞെടുപ്പ് കമ്മിഷൻ. വിഷയത്തിൽ കമ്മീഷൻ ഇരുപാർട്ടികൾക്കും നോട്ടീസ് നൽകി.
ബിജെപി അധ്യക്ഷൻ ജെപി നദ്ദയ്ക്കും കോൺഗ്രസ് അധ്യക്ഷൻ മല്ലികാർജുൻ ഖാർഗെയ്ക്കും അയച്ച നോട്ടീസിൽ എതിർകക്ഷിയുടെ പരാതികളോട് കമ്മീഷൻ പ്രതികരണം തേടിയിട്ടുണ്ട്.
ജാർഖണ്ഡ്, മഹാരാഷ്ട്ര നിയമസഭാ തിരഞ്ഞെടുപ്പുകൾക്കും ഉപതിരഞ്ഞെടുപ്പുകൾക്കും വേണ്ടിയുള്ള പ്രചാരണത്തിനിടെ കോൺഗ്രസിൻ്റെ താരപ്രചാരകർ തിരഞ്ഞെടുപ്പ് ചട്ടലംഘനം നടത്തിയെന്ന് ആരോപിച്ച് നവംബർ 11ന് ബിജെപി നൽകിയ പരാതി തിരഞ്ഞെടുപ്പ് സമിതി ഖാർഗെയ്ക്ക് അയച്ച കത്തിൽ ചൂണ്ടിക്കാട്ടി.
സമാനമായി നദ്ദയ്ക്ക് അയച്ച കത്തിൽ, തിരഞ്ഞെടുപ്പ് പ്രചാരണത്തിനിടെ ബിജെപിയുടെ താരപ്രചാരകർ മാതൃകാ പെരുമാറ്റച്ചട്ടം ലംഘിച്ചുവെന്ന് ആരോപിച്ച് നവംബർ 13 ന് കോൺഗ്രസ് നൽകിയ രണ്ട് പരാതികളും തിരഞ്ഞെടുപ്പ് കമ്മീഷൻ ചൂണ്ടിക്കാട്ടി. തിങ്കളാഴ്ച ഉച്ചയ്ക്ക് ഒരുമണിക്കകം ഔദ്യോഗിക പ്രതികരണം അറിയിക്കാൻ ഇരു പാർട്ടി മേധാവികളോടും കമ്മീഷൻ ആവശ്യപ്പെട്ടിട്ടുണ്ട്.
TAGS: NATIONAL | ELECTION COMMISION OF INDIA
SUMMARY: ECI sents notice to congress, bjp on code of conduct violation
