ബെംഗളൂരു: ദീപാവലി പ്രമാണിച്ച് ബെംഗളൂരുവിൽ പടക്ക വിൽപന നിരീക്ഷിക്കാൻ ജോയിന്റ് ടാസ്ക് ഫോഴ്സ് രൂപീകരിച്ചു. പടക്കങ്ങൾ സുരക്ഷിതമായി വിൽക്കുന്നതിനുള്ള നിയന്ത്രണങ്ങൾ കർശനമായി നടപ്പാക്കുന്നുവെന്ന് ഉറപ്പാക്കാനാണിത്. ഇതിനായി നഗരത്തിൽ സബ് ഡിവിഷൻ തലത്തിൽ സംയുക്ത ടാസ്ക് ഫോഴ്സ് രൂപീകരിച്ചതായി സിറ്റി പോലീസ് കമ്മിഷണർ ബി.ദയാനന്ദ അറിയിച്ചു.
നഗരത്തിലുടനീളമുള്ള പടക്കങ്ങളുടെ വിൽപ്പനയും ഉപയോഗവും ടാസ്ക് ഫോഴ്സ് നിരീക്ഷിക്കുകയും, അടിയന്തിര സാഹചര്യമുണ്ടായാൽ കർശന നടപടിയെടുക്കുകയും ചെയ്യും. ഫോഴ്‌സിന് അസിസ്റ്റൻ്റ് പോലീസ് കമ്മീഷണർ (എസിപി) നേതൃത്വം നൽകും. ഫയർ ആൻഡ് എമർജൻസി സർവീസസ്, ബിബിഎംപി, ബെസ്കോം, കർണാടക സംസ്ഥാന മലിനീകരണ നിയന്ത്രണ ബോർഡ് (കെഎസ്‌പിസിബി) എന്നിവയുടെ പ്രതിനിധികൾ ഫോഴ്‌സിൽ ഉണ്ടായിരിക്കും.
കഴിഞ്ഞ വർഷം ദീപാവലിക്കിടെ നഗരത്തിലും പരിസരത്തുമായി പടക്കങ്ങൾ പൊട്ടിച്ച് ഇരുന്നൂറോളം അപകടങ്ങൾ റിപ്പോർട്ട് ചെയ്യപ്പെട്ടിട്ടുണ്ടെന്നും പടക്കം പൊട്ടിക്കുമ്പോൾ പരമാവധി മുൻകരുതലുകൾ എടുക്കണമെന്നും ബി. ദയാനന്ദ പറഞ്ഞു. സുപ്രീം കോടതി മാർഗനിർദേശങ്ങൾ അനുസരിച്ച്, ഹരിത പടക്കങ്ങളുടെ വിൽപ്പനയും ഉപയോഗവും മാത്രമേ സംസ്ഥാനത്ത് അനുവദിക്കൂ.
രാത്രി 8 മണി മുതൽ 10 വറെ മാത്രമേ മാത്രമേ പടക്കം പൊട്ടിക്കാൻ പാടുള്ളൂവെന്ന് കെഎസ്പിസിബിയും നിർദേശം നൽകിയിട്ടുണ്ട്. സിറ്റി പോലീസ് പുറപ്പെടുവിച്ച മാർഗ്ഗനിർദ്ദേശങ്ങൾ ലംഘിക്കുന്നവർക്കെതിരെ പിഴ ഈടാക്കുമെന്ന് കമ്മീഷണർ അറിയിച്ചു. ഇതിന് പുറമെ സ്കൂളുകൾ, ആശുപത്രികൾ, ആരാധനാലയങ്ങൾ എന്നിവിടങ്ങൾക്ക് സമീപം പടക്കം പൊട്ടിക്കരുതെന്നും അദ്ദേഹം നിർദേശിച്ചു.
TAGS: BENGALURU | DEEPAVALI
SUMMARY: Joint task forces at sub-divisional level to monitor sale and use of firecrackers in Bengaluru
