പത്തനംതിട്ട: ശബരിമലയിലെ മില്‍മ നെയ്യ് വെട്ടിപ്പ് കേസില്‍ ആദ്യ അറസ്റ്റ് രേഖപ്പെടുത്തി. സന്നിധാനത്തേക്ക് വിതരണം ചെയ്യാനെത്തിച്ച ലക്ഷക്കണക്കിന് രൂപയുടെ മില്‍മ നെയ്യ് വഴിമാറ്റി വിറ്റ കേസിലെ പ്രധാന ട്രാന്‍സ്‌പോര്‍ട്ട് കരാറുകാരനായ എസ്.എസ് ബിനുവാണ് പോലിസിന്റെ പിടിയിലായത്.
ഗുണനിലവാരമുള്ള യഥാര്‍ത്ഥ മില്‍മ നെയ്യുനു പകരം വിപണിയില്‍ വിലകുറഞ്ഞ വ്യാജ/ഉറപ്പില്ലാത്ത നെയ്യ് സന്നിധാനത്ത് എത്തിക്കുകയായിരുന്നുവെന്നാണ് അന്വേഷണ സംഘത്തിന്റെ കണ്ടെത്തല്‍. ഈ തട്ടിപ്പിലൂടെ തിരുവിതാംകൂര്‍ ദേവസ്വം ബോര്‍ഡിന് ഏകദേശം രണ്ടര കോടി രൂപയുടെ സാമ്പത്തിക നഷ്ടമാണ് സംഭവിച്ചിട്ടുള്ളത്.
തമിഴ്‌നാട് കേന്ദ്രീകരിച്ച് പ്രവര്‍ത്തിക്കുന്ന ‘ശ്രീ വെങ്കിടേശ്വര ട്രേഡേഴ്‌സ്’, ‘ലിയോ ട്രേഡേഴ്‌സ്’ എന്നീ രണ്ട് ഏജന്‍സികളിലേക്കാണ് സന്നിധാനത്തേക്ക് കൊണ്ടുവന്ന നെയ്യ് ഇയാള്‍ രഹസ്യമായി മറിച്ചുവിറ്റത്. പത്തനംതിട്ട ഡയറിയില്‍ നിന്ന് സന്നിധാനത്തേക്ക് കൊണ്ടു പോകുന്ന വഴിമധ്യേ ആണ് നെയ്യ് മാറ്റിയത് എന്നാണ് വിവരം. കേസില്‍ കൂടുതല്‍ പേര്‍ ഉള്‍പ്പെട്ടിട്ടുണ്ടോയെന്നറിയാന്‍ പോലിസ് അന്വേഷണം ഊര്‍ജിതമാക്കിയിട്ടുണ്ട്. ഹൈക്കോടതിയുടെ നിര്‍ദേശപ്രകാരമാണ് വിജിലന്‍സിന്റെ പ്രത്യേക സംഘം അന്വേഷണം ഏറ്റെടുത്തത്.
