ഗോരഖ്പൂർ: ഉത്തർപ്രദേശിലെ ഗോരഖ്പൂരിൽ നായയുടെ കടിയേറ്റ് ചത്തെന്ന് സംശയിക്കുന്ന പശുവിന്റെ പാലിൽ തയാറാക്കിയ പ്രസാദം (ചരണാമൃതം) കഴിച്ച 450 പേർക്ക് പേവിഷ പ്രതിരോധ വാക്സിൻ നൽകി. ദുർഗാപൂജയ്ക്കിടെ ദാദി ഖാസ് ഗ്രാമത്തിൽ ദുർഗ്ഗാ പൂജയോടനുബന്ധിച്ച് തയ്യാറാക്കിയ പ്രസാദത്തിലാണ് പശുവിന്റെ പാൽ ഉപയോഗിച്ചിരുന്നത്. പിന്നീട് പശു അസ്വാഭാവിക പെരുമാറ്റം കാണിക്കുകയും ചാവുകയും ചെയ്തതോടെയാണ് നാട്ടുകാർക്കിടയിൽ ഭീതി പടർന്നത്. തുടർന്ന് ആരോഗ്യവകുപ്പ് പ്രത്യേക ക്യാമ്പ് സംഘടിപ്പിച്ചാണ് ജനങ്ങൾക്ക് പ്രതിരോധ കുത്തിവെപ്പ് നൽകിയത്.
ഗോല ബ്ലോക്കിലെ ദാദി ഖാസ് ഗ്രാമത്തിൽ ബുധനാഴ്ച ആരോഗ്യവകുപ്പ് വാക്സിനേഷൻ ക്യാംപ് സംഘടിപ്പിച്ചു. ചൊവ്വാഴ്ച കമ്മ്യൂണിറ്റി ഹെൽത്ത് സെന്ററിൽ 50 പേർ വാക്സിൻ സ്വീകരിച്ചിരുന്നു. ബുധനാഴ്ച ക്യാംപിലൂടെ 400 പേർക്ക് കൂടി വാക്സിൻ നൽകി. പശുവിന്റെ പാൽ രണ്ട് കടകളിലേക്കും നിരവധി വീടുകളിലേക്കും വിതരണം ചെയ്തിരുന്നതായും ഇതോടെ ദാദി ഖാസ്, സമീപത്തെ ഗോവിന്ദ്പുർ ഗ്രാമങ്ങളിലെ ആളുകൾ ആശങ്കയിലായതായും റിപ്പോർട്ടുകൾ പറയുന്നു.
പശുവിന്റെ ഉടമ നവമി യാദവിന്റെ പറയുന്നതനുസരിച്ച്, ഒന്നോ രണ്ടോ ദിവസമായി പശുവിന് അസ്വസ്ഥതയുണ്ടായിരുന്നു. ചൊവ്വാഴ്ചയോടെ നില വഷളായി. മൃഗഡോക്ടർമാരെ സമീപിച്ചപ്പോൾ പശുവിനെ തെരുവുനായ കടിച്ചിരിക്കാമെന്ന സംശയം ഉയർന്നു. തുടർന്ന് പശു അസാധാരണമായി പെരുമാറുകയും കുരയ്ക്കുന്നതുപോലുള്ള ശബ്ദങ്ങൾ പുറപ്പെടുവിക്കുകയും ചെയ്തശേഷം ചൊവ്വാഴ്ച വൈകുന്നേരം ചത്തു.
എന്നാൽ ലക്ഷണങ്ങൾ മാത്രം കണ്ട് പശുവിന് പേവിഷബാധയുണ്ടായിരുന്നുവെന്ന് സ്ഥിരീകരിക്കാനാകില്ലെന്ന് മൃഗഡോക്ടർമാർ വ്യക്തമാക്കി. രോഗകാരണം ഉറപ്പാക്കാൻ വിശദമായ പരിശോധന ആവശ്യമാണ്. അതേസമയം, ചരണാമൃതം കഴിച്ചവരിൽ പേവിഷബാധയുണ്ടായതായി സ്ഥിരീകരിച്ച വിവരങ്ങളൊന്നും റിപ്പോർട്ടിലില്ല.
ആരോഗ്യപ്രശ്നങ്ങളോ രോഗസാധ്യതയുള്ള വസ്തുക്കളുമായുള്ള സമ്പർക്കത്തെക്കുറിച്ച് ആശങ്കയോ ഉള്ളവർ ഡോക്ടറെ സമീപിച്ച് വാക്സിൻ ആവശ്യമുണ്ടോയെന്ന് നിർണയിക്കണമെന്ന് ആരോഗ്യവകുപ്പ് നിർദേശിച്ചു. പാൽ നന്നായി തിളപ്പിച്ചശേഷം മാത്രം ഉപയോഗിക്കണമെന്നും പച്ചപ്പാൽ കുടിക്കുന്നത് ഒഴിവാക്കണമെന്നും അധികൃതർ മുന്നറിയിപ്പ് നൽകി.
SUMMARY: Cow dies after being bitten by a dog; 450 people who consumed ‘pal prasadam’ (milk-based offering) are administered anti-rabies vaccine.
