ബെംഗളൂരു: 76-ാമത് റിപ്പബ്ലിക് ദിനാഘോഷം വിപുലമായി ആഘോഷിക്കാനൊരുങ്ങി നഗരം. ഫീൽഡ് മാർഷൽ സാം മനേക്ഷാ പരേഡ് ഗ്രൗണ്ടിലാണ് പരേഡ് ഉൾപ്പെടെയുള്ള പരിപാടികൾ നടക്കുന്നത്. അനിഷ്ട സംഭവങ്ങൾ ഒഴിവാക്കാൻ വേദിയിലും പരിസരത്തും കനത്ത സുരക്ഷാ ക്രമീകരണങ്ങൾ ഒരുക്കിയിട്ടുണ്ട്. ഗവർണർ താവർചന്ദ് ഗെലോട്ട് രാവിലെ 9 മണിക്ക് ത്രിവർണ പതാക ഉയർത്തുകയും റിപ്പബ്ലിക് ദിന പ്രസംഗത്തിന് മുമ്പ് ഗാർഡ് ഓഫ് ഓണർ സ്വീകരിക്കുകയും ചെയ്യും. 8,000 പേർക്ക് പരേഡ് ഗ്രൗണ്ടിൽ ഇരിപ്പിട ക്രമീകരണങ്ങളും 6,000 പേർക്ക് പാസുകളും നൽകിയിട്ടുണ്ട്.
1,150 പേർ അടങ്ങുന്ന 38 പ്ലാറ്റൂണുകൾ പരേഡിൽ പങ്കെടുക്കുമെന്ന് ബിബിഎംപി ചീഫ് കമ്മീഷണർ തുഷാർ ഗിരിനാഥ് പറഞ്ഞു. 38 പ്ലാറ്റൂണുകളിൽ എട്ട് ബാൻഡ് ടീമുകളും, 11 സ്കൂൾ ടീമുകളും, രണ്ട് ഭിന്നശേഷി വിഭാഗ ടീമുകളും, ഒരു ഡോഗ് സ്ക്വാഡും ഉൾപ്പെടുന്നു. ആദ്യമായി കേരള സംസ്ഥാന സായുധ പോലീസ് പ്ലാറ്റൂണും പരേഡിന്റെ ഭാഗമാകും.
പരേഡ് ഗ്രൗണ്ടിലും പരിസരത്തും സുരക്ഷയ്ക്കായി എട്ട് ഡെപ്യൂട്ടി പോലീസ് കമ്മീഷണർമാർ, 17 അസിസ്റ്റന്റ് പോലീസ് കമ്മീഷണർമാർ, 44 പോലീസ് ഇൻസ്പെക്ടർമാർ, 80 വനിതാ പോലീസ് ഉദ്യോഗസ്ഥർ എന്നിവരുൾപ്പെടെ 1,051 പോലീസ് ഉദ്യോഗസ്ഥരെ വിന്യസിച്ചിട്ടുണ്ടെന്ന് സിറ്റി പോലീസ് കമ്മീഷണർ ബി. ദയാനന്ദ പറഞ്ഞു. കൂടാതെ ഗരുഡ കമാൻഡോ സേനയെയും 10 കർണാടക സ്റ്റേറ്റ് റിസർവ് പോലീസ് പ്ലാറ്റൂണുകളും വിന്യസിച്ചിട്ടുണ്ട്.
TAGS: BENGALURU | REPUBLIC DAY
SUMMARY: Bengaluru gears up for Republic day celebrations
