ബെംഗളൂരു: സർക്കാർ-എയ്ഡഡ് പുനരധിവാസ കേന്ദ്രങ്ങളിലും, ശിശുസംരക്ഷണ സ്ഥാപനങ്ങളിലും ജന്മദിനാഘോഷങ്ങൾ വിലക്കി കർണാടക സർക്കാർ. സ്റ്റാഫ് അംഗങ്ങൾ, ഉദ്യോഗസ്ഥർ, സെലിബ്രിറ്റികൾ, വിശിഷ്ട വ്യക്തികൾ, കുട്ടികൾ, മറ്റ് വ്യക്തികൾ എന്നിവർക്കും നിരോധനം ബാധകമായിരിക്കും.
നിരവധി ജീവനക്കാരും ഉദ്യോഗസ്ഥരും മറ്റുള്ളവരും ശിശുസംരക്ഷണ സ്ഥാപനങ്ങളിൽ ജന്മദിനം ആഘോഷിക്കുന്നതും കേക്ക് മുറിക്കുന്നതും കുട്ടികൾക്ക് മധുരപലഹാര വിതരണവും നടത്തുന്നതായി കണ്ടെത്തിയതിനെ തുടർന്നാണ് നടപടി. ഇത്തരം കേന്ദ്രങ്ങളിലെ പല കുട്ടികളും നിരവധി വെല്ലുവിളി നിറഞ്ഞ പശ്ചാത്തലത്തിൽ നിന്നുള്ളവരായതിനാൽ, ഇത്തരം ജന്മദിനാഘോഷങ്ങളിൽ അവർക്ക് താൽപര്യമുണ്ടാകില്ലെന്നും അത് അവരുടെ ആത്മാഭിമാനത്തെ ഹനിച്ചേക്കാമെന്നും ചൂണ്ടിക്കാട്ടിയാണ് നടപടി.
ഇത്തരം കുട്ടികളുടെ മാനസികാരോഗ്യം സംരക്ഷിക്കുന്നതിനുള്ള ഒരു നടപടിയായാണ് ഉത്തരവ് എന്നും സർക്കാർ ചൂണ്ടിക്കാട്ടി. എന്നാൽ ഉത്തരവ് റഗുലർ സ്കൂളുകൾക്ക് ബാധകമല്ലെന്ന് സ്കൂൾ വിദ്യാഭ്യാസ, സാക്ഷരതാ വകുപ്പ് കമ്മീഷണർ വ്യക്തമാക്കി.
TAGS: KARNATAKA| BAN| BIRTHDAY
SUMMARY: Karnataka govt bans birthdays at children’s home
