തിരുവനന്തപുരം: നഗരത്തിലെ ക്രമസമാധാന ചുമതലയുള്ള എഡിജിപിയുടെ ഓഫീസില് തേനീച്ചകളുടെ ആക്രമണം. ഡ്യൂട്ടിയിലുണ്ടായിരുന്ന നാല് പോലീസുകാർ ഉള്പ്പെടെ ആകെ ഏഴുപേർക്കാണ് കുത്തേറ്റത്. പേരൂർക്കട എസ്.എ.പി ക്യാമ്പിന് സമീപം പ്രവർത്തിക്കുന്ന എ.ഡി.ജി.പി ഓഫീസിലാണ് സംഭവം നടന്നത്. ഓഫീസിന് മുകളില് കെട്ടിടത്തിൻ്റെ പുറംചുവരില് ഒരു വലിയ തേനീച്ചക്കൂട് ഉണ്ടായിരുന്നു.
കുറച്ച് കാലം മുമ്പ് ഇതേ സ്ഥലത്തുണ്ടായിരുന്ന ഭീമൻ തേനീച്ചക്കൂട് ആദിവാസി വിഭാഗക്കാരായ ആളുകളെ എത്തിച്ച് നീക്കം ചെയ്തിരുന്നു. എന്നാല് തേനീച്ചകള് വീണ്ടും ഇവിടെ തന്നെ കൂടുണ്ടാക്കി. പിന്നീട് ഈ കൂട് വലുതായി വന്നെങ്കിലും പോലീസുകാർ അതിനെ ഗൗരവത്തോടെ കണ്ടില്ല. ഇന്ന് വൈകിട്ട് കൂടിളകി വന്ന തേനീച്ചകള് പോലീസുകാരെയും ഓഫീസിന് മുന്നിലൂടെ പോയ സ്ത്രീ അടക്കമുള്ളവരെയും കുത്തുകയായിരുന്നു. ഏഴ് പേരെയാണ് ഇപ്പോള് ആശുപത്രിയിലേക്ക് മാറ്റിയിരിക്കുന്നത്.
കൂടുതല് പേർക്ക് കുത്തേറ്റില്ലെന്നാണ് വിവരം. പരുക്കേറ്റവരുടെ ആരോഗ്യനില സംബന്ധിച്ചും വ്യക്തത വന്നിട്ടില്ല. അതേസമയം ഈ സംഭവത്തിൻ്റെ പശ്ചാത്തലത്തില് നാളെ തന്നെ തേനീച്ചക്കൂട് ഇവിടെ നിന്ന് നീക്കം ചെയ്യാൻ ക്രമസമാധാന ചുമതലയുള്ള എഡിജിപി നിർദേശം നല്കി. ഇതിനായി വൈദഗ്ധ്യമുള്ള ആദിവാസി വിഭാഗക്കാരെ എത്തിക്കാനും എഡിജിപി വെങ്കിടേഷ് നിർദേശം നല്കിയതായാണ് വിവരം.
SUMMARY: 7 people, including policemen, injured in bee attack at ADGP office in Thiruvananthapuram
WhatsApp
Telegram
