തിരുവനന്തപുരം: ഈ വർഷത്തെ എസ്.എസ്.എൽ.സി പരീക്ഷ തിങ്കളാഴ്ച അവസാനിക്കും. രാവിലെ 9.30 മുതൽ 11.15 വരെ ബയോളജിയാണ് അവസാന പരീക്ഷ. ഹയർ സെക്കൻഡറി പരീക്ഷ ശനിയാഴ്ച പൂർത്തിയായിരുന്നു. രണ്ട് പരീക്ഷകളുടെയും ഉത്തരക്കടലാസ് മൂല്യനിർണയം ഏപ്രിൽ 16ന് തുടങ്ങും. ഏപ്രിൽ ഏഴിന് തുടങ്ങാനിരുന്ന മൂല്യനിർണയം നിയമസഭ തിരഞ്ഞെടുപ്പ് പ്രഖ്യാപിച്ച സാഹചര്യത്തിലാണ് 16ലേക്ക് മാറ്റിയത്. മൂല്യനിർണയ തീയതി മാറ്റിയതിനാൽ നേരത്തെ നിശ്ചയിച്ച രീതിയിൽ മേയ് എട്ടിന് എസ്.എസ്.എൽ.സി ഫലം പ്രസിദ്ധീകരിക്കാനാവില്ലെന്നാണ് വിവരം.
ഇത്തവണ എസ്എസ്എൽസിക്ക് 4.17 ലക്ഷം വിദ്യാർഥികളാണ് പരീക്ഷ എഴുതിയത്. പ്ലസ് ടു പരീക്ഷയ്ക്കിരുന്നത് 4.52 ലക്ഷം വിദ്യാർഥികളും പ്ലസ് വണ്ണിന് 4.11 ലക്ഷം വിദ്യാർഥികളുമാണ്.
അതേസമയം പരീക്ഷകൾ അവസാനിച്ച് സ്കൂൾ അടയ്ക്കുന്ന ദിവസം ആഘോഷ പരിപാടികൾ അതിരുവിടരുതെന്ന കർശന നിർദേശം പൊതുവിദ്യാഭ്യാസ വകുപ്പ് പുറപ്പെടുവിച്ചു. ആവശ്യമെങ്കിൽ സ്കൂൾ കോന്പൗണ്ടി ന്റെ പുറത്ത് പോലീസിന്റെ സാന്നിധ്യം സ്കൂൾ അധികൃതർക്ക് ഉറപ്പാക്കാമെന്നും സർക്കുലറിൽ വ്യക്തമാക്കുന്നു.
SUMMARY: SSLC exam will end today
