തിരുവനന്തപുരം: പസഫിക് സമുദ്രത്തിലെ എൽ-നിനോ (El-Nino) പ്രതിഭാസത്തിന്റെ സ്വാധീനം മൂലം ഇത്തവണത്തെ തെക്കുപടിഞ്ഞാറൻ കാലവർഷം ദുർബലമായേക്കുമെന്ന് കാലാവസ്ഥാ നിരീക്ഷണ കേന്ദ്രം. കേരളമുൾപ്പെടെയുള്ള തെക്കേ ഇന്ത്യൻ സംസ്ഥാനങ്ങളിൽ സാധാരണ ലഭിക്കേണ്ട മഴയിൽ കുറവുണ്ടാകുമെന്നാണ് പ്രാഥമിക വിലയിരുത്തൽ.
അതേസമയം കാലവർഷം വൈകാനും ദുർബലമാകാനുമുള്ള സാധ്യത നിലനിൽക്കെ സംസ്ഥാനത്ത് ചൂട് ക്രമാതീതമായി വർധിക്കുകയാണ്. ഇതിന്റെ ഭാഗമായി വിവിധ ജില്ലകളിൽ കേന്ദ്ര കാലാവസ്ഥാ വകുപ്പ് യെല്ലോ അലർട്ട് പ്രഖ്യാപിച്ചു.
കൊല്ലം, പാലക്കാട്, കോഴിക്കോട്, കാസറഗോഡ്‌ ജില്ലകളിൽ താപനില 38 ഡിഗ്രി സെൽഷ്യസ് വരെ ഉയർന്നേക്കാം. ആലപ്പുഴ, കോട്ടയം, എറണാകുളം, തൃശൂർ, കണ്ണൂർ ജില്ലകളിൽ ഉയർന്ന താപനില 37 ഡിഗ്രി സെൽഷ്യസ് വരെയാകാൻ സാധ്യതയുണ്ട്. പത്തനംതിട്ട ജില്ലയിൽ താപനില 36 ഡിഗ്രി സെൽഷ്യസ് വരെ ഉയർന്നേക്കും.
സാധാരണ താപനിലയേക്കാൾ 2 മുതൽ 3 ഡിഗ്രി സെൽഷ്യസ് വരെ വർധനവാണ് രേഖപ്പെടുത്തുന്നത്. അന്തരീക്ഷത്തിൽ ഈർപ്പം (Humidity) കൂടുന്നതിനാൽ മലയോര മേഖലകളൊഴികെയുള്ള സ്ഥലങ്ങളിൽ കടുത്ത അസ്വസ്ഥത അനുഭവപ്പെട്ടേക്കാം. സൂര്യതാപം, നിർജ്ജലീകരണം എന്നിവ ഒഴിവാക്കാൻ പൊതുജനങ്ങൾ ആവശ്യമായ മുൻകരുതലുകൾ എടുക്കണമെന്ന് അധികൃതർ നിർദ്ദേശിച്ചു.
വേനൽ മഴയുടെ നേരിയ സാദ്ധ്യതയുണ്ടെങ്കിലും വരും മാസങ്ങളിൽ ജലക്ഷാമം ഉൾപ്പെടെയുള്ള പ്രതിസന്ധികൾക്ക് എൽ-നിനോ കാരണമായേക്കുമെന്നാണ് ആശങ്ക.
SUMMARY: El Nino likely; Rainfall to decrease in Kerala
